Мордовиянь Оцюнясь Владимир Волков 27 мартста выступандась Государственнай Собранияти Посланиянц мархта. Программнай документсь лувфоль Культурань Республиканскяй кудса. Региононь вятись тись итокт 2018 кизоня республикать социально-экономическяй касондоманцты-вииякшнеманцты и путсь задачат эряенди.
Экономикась
Мелясь, кода отмечазе Владимир Волков, аделавсь Мордовияти удалафста эряфонь сембе ширетнень коряс. Промышленностьса производствань объемтне кассть 9 процентта, цебярь результатт сатсть аграрийхне, ветеце кизось мельцек кочкамок 1 миллион тоннада лама сера. Ламода кассть торговлянь, связень, социальнай сферань организациянь услугатнень объемсна. Пяшкотьф строительнай программась. Лац мольтевсь Президентть майскяй указонзон пяшкотькшнемасна. Решандаф заработнай платать касфнеманц мархта сотф кизефкссь. Валовай региональнай продуктать касомац арась 3 процентт, мезсь 1,5-крда сяда лама целайнек странать эзга тя показательть коряс. Меля бизнесть мархта основной капиталти инвестировандаф пцтай 44 миллиард цалковай, мезсь пцтай 7 процентта сяда лама тяда ингольдень кизоть коряс. Тяда башка, регионть виияфнеманкса 20 миллиард цалковаень лувксса инвестиция нолдафоль федеральнай и республиканскяй бюджеттнень эзда.
«Ули сембе эрявикссь, штоба минь марса – властсь, бизнессь и обществась – решандалеськ инь оржа кизефксть, кона сотф населениять афкуксонь доходонзон касфнемаснон мархта, - мярьгсь Мордовиянь Оцюнясь. – Минь целеньке – сувамс средняй заработнай платать коряс странань региоттнень спискаснон кучкас. Тянкса вете кизоста тейнек эряви касфтомс сонь 40 тежянь цалковайс и обеспечендамс населениять доходонзон касомаснон кафтонь-крда сяда ламоксть целайнек странаса тя показательть коряс. Шарфтса министерствань и предприятиянь вятихнень мяльснон: дохоттнень касомасна обеспечендама васендакиге основной персоналть заработнай платать касфтоманц вельде. Рабочайхнень зарплатаснон минь карматама лувондомонза башка руководителеннеть эзда. И бизнесть государственнай лезксонц, аф ваномок сонь оцюшинц и значимостенц лангс, васендакиге должетт получсемс ся работань макссихне, конат обеспечендакшнесазь эсь работникснонды средняй зарплатать».
2019 кизонь фкя инь васенце инвестиционнай проектокс Владимир Волков азозень оптическяй волокнать производстванц касфнеманц, шинь электростанциянь компоненттнень производстваснон келепнеманц («ХЕЛИОС-Ресурссь»), од антибиотиконь нолнемать, ампуласа импортонь полафни инъекционнай препараттнень производстваснон келепнеманц («Биохимиксь»), «Плайтера», «Эпромет», «Лидер-Компаунд», «Сарансккабель», «Сарансккабель-Оптика», «Лисма», «Лато» обществатнень эса тяниень пингонь производстватнень виияфнемаснон. Ня проекттнень эряфс етафнемасна обеспечендасы производствань объемтнень касомаснон пцтай 16 миллиард цалковайс.
Улихть договоренностть Рузаевкаса стеклотарань заводть тевс нолдаманц коряс, васенце этапса арьсекшневи панжемс тоса 300 рабочай васта, а пингонь етазь касфтомс синь лувксснон 700 молемс.
АПК-сь и переработкась
Мордовиянь Оцюнясь отмечазе: пяк лама сави тиемс агропромышленнай комплексть виияфнеманкса. Меля республикань аграрийхне кочкасть 1 миллион 144 тежянь тонна сера и ПФО-са сатсть инь цебярь результат урожайностть коряс – 28 центнерда лама гектарста.
Сивольть производствац целайнек республикать эзга – 315 тежянь тоннада лама, мезсь сяда лама 2017 кизонь объемтнень коряс пцтай 7 процентта. Лофцть производствац кассь 3 процентта, алхнень – 5 процентта.
Розань производствань объемтне кассть 40 миллион штукас кизоти. «Курок эрь кафксоце розась Россияса кармай касфтф Мордовияса!» - китькстазе Владимир Волков.
Лац работасть пищевой и перерабатывающай промышленностень предприятиятне. Мордовиясь педа-пес обеспечендакшнесы эсь прянц основной ярхцамбяльхнень мархта и нолневи продукциять мзярошкац мишендеви ширеса. Конкуренциянь кирнеманьке тага весть кемокстафоль «Золотая осень» 20-це Российскяй агропромышленнай выставкать результатонзон мархта. Мордовиясь кемоньцеда мельцек получазе выставкань Гран-прить. Мордовиянь колма предприятиятне получазь «100 лучших товаров России» конкурсонь казнетнень. «Качествань лидеркс» арась «Саранский» консервнай заводсь. «Импортонь полафнемаса заслуганкса» отмечаф «Сармич» сыровареннай заводсь. Саранскяй ликероводочнай заводсь получазе Россиянь Правительствать премиянц – тяфтама казне Мордовиянь предприятиясь получась васенцеда.
Мекольдень кизотнень республикаса ушедсь виияфневома велень хозяйствань продукциять экспортоц, кона тяни пачфневи мастор лангонь 24 странав. Меля минь продукцияньконь омба мастору пачфнемаснон объемонза ульсть 16 миллион цалковайда лама. Маластонь вете кизотнень сон должен касомс колмонь-крда.
Строительствась
Лац шумордазь кизоть Мордовиянь строительхне. Эсь пингстонза и цебярь качестваса аноклафтольхть футболть коряс миронь чемпионатонь сембе объекттне. Но фкя инь васенцесь – республикась етафтозе эряфс социальнай инфраструктурань объектонь строямань беспрецедентнай программать, кона кодавок аф сотнеф чемпионатть мархта. Пяшкотьфт арьсеф сембе программатне, конат сотфт школань, идень садонь, здравоохранениянь объектонь, кинь строямать мархта. Строяф 333 тежянь квадратнай метрада лама эряма васта, мезсь макссь возможность отмечамс новоселья республикань 4 тежятть семьяти.
Меля строяф и петьф пцтай 100 вайгяльбень кувалмоса федеральнай, региональнай и местнай значениянь ки.
Тядде строительхненди сави решандамс аф сяда емла задачат. Сави строямс 338 тежянь квадратнай метра эряма васта, а 2024 кизоть самс эряма вастонь строямань объемтне Мордовияса должетт касомс 1,5-крда – 500 тежянь квадратнай метрас кизоста.
Строительхненди эряви примамс активнай участия «Обеспечение устойчивого сокращения непригодного для проживания жилищного фонда» федеральнай проектть эряфс етафнемаса. Кота кизоста машфтови 80 тежянь квадратнай метрада лама аварийнай эряма васта – тянкса нолдави 3 миллиард цалковайда лама. Тяда башка, 850 миллион цалковай тядде нолдави лама квартирань куттненди капитальнай ремонтонь тиеманкса.
Нацпроектть рамкаса Мордовиясь получай федеральнай бюджетста 16 миллиард цалковайда лама кинь строяманкса. «Эряви петемс-тиемс уликс китнень, строямс отт, конат азфтольхть избирательхнень наказснон эса», - китькстазе Владимир Волков.
Демографиясь и здравоохранениясь
Мордовиянь Оцюнясь башка отмечазе: штоба сатомс экономикаса арьсеф показательхнень, оцю аськолкс тиема социальнай сфераса. Штоба обеспечендамс регионца населениять касоманц, сави примамс лама мера. Тяконь лвксса Мордовиянь Оцюнясь путсь задача республикань Правительствать инголе арьсемс шаба мархта иттнень ширеснон кирдеманкса налоговай мерат.
Стане жа 2021 кизоть самс панжеви 2 тежяньда лама ясельнай васта и машфтови очередсь идень саду 3 кизонь топодемс иттнень еткса.
«Здравоохранение» нацпроектть эряфс етафнеманкса Мордовияса нолдави пцтай 8 миллиард цалковай. Кочкафт стратегическяй ширетне, конатнень лангса сави работамсвасендакиге. Тя первичнай медицинскяй лезкссь, нкологиясь, сердечно-сосудистай заболеваниятне и идень медицинась.
«Первичнай медико-санитарнай лезкссь должен ащемс марнек медицинать юрса. Тейнек сави строямс 4 од ФАПт, нинге 22-ть етафтомс благоустроендаф помещенияс. Федеральнай бюджетста тянкса минь получатама 226 миллион цалковай. Нинге 260 миллион цалковайда лама нолдави 20 мобильнай медицинскяй комплексонь рамаманкса. Тя лезды пяшкодемс ичкоздень велетнень эса лезксонь максомань вешфксть. Эрявихть козякофтомс медоборудованияса 4 первичнай сосудистай отделениятне – Рузаевкаса, Краснослободскяйса, Комсомольскяй поселкаса и Катковонь лемса РКБ-са. Тяда башка, кизоть аделавомс тевс сувафтома Саранскяйса идень поликлиникась, конань учендсазь Химмашень эряйхне. Тянкса нолдави 314 миллион цалковайда лама. Стане жа тядде минь получатама 200 миллион цалковайть малава ярмаконь лезкс «Юбилейный» микрорайонца оцювонь поликлиникать оборудованияса козякофтоманкса, - отмечазе Владимир Волков.
Тяка пингть Мордовиянь Оцюнясь башка китькстазе: поликлиникатне и шинь стационархне ванфтовихть сембе райоттнень эса. Синь эрявихть петемс, козякофтомс тяниень пингонь оборудованияса, обеспечендамс кадраса.
Кизоть аделавомс шумордави Республиканскяй онкологическяй диспансерть од поликлиниканц строямац. Мезьда меле ушеды од оборудованияса сонь козякофтомац. Онкологическяй лезксонь амбулаторнай центратне эвондайхть межрайоннай больницятнень эса. Марса тянкса нолдави 2 миллиартт 300 миллион цалковай. «Сембе минь шарьхкотькшнесаськ, кодама питни мумс урмать аньцек срхкамстонза. Тячи минь улихть возможностеньке, штоба онкологическяй урмань ламоц виттнень пингста педа-пес пчкафтомс ломанть», - мярьгсь Владимир Волков.
Образованиясь
Республикань Оцюнясь отмечазе: мекольдень кизотнень лама тиф образованиять виияфнеманкса. Меля панжевсть кафта од школат – Рузаевкаса и Саранскяйса Солнечнай ульцяса. Шумордавсь Зубово-Полянскяй райононь Умет поселкаса школать строямац. Фкя пяле мархта кизода инголе ушедсь работама «Тавла» образованиянь центрась, республикаса инь оцю школась. Тонафнемань од кизоть эсонза ушедозь ни 1,5 тежянь шабась. Сяс маластонь кизотнень арьсекшневи строямс нинге фкя школа «Юбилейный» эрямань комплексть 4 микрорайонцонза. Эряви школа и Саранскяйть юго-западнай ширесонза. Фурмановонь и Щорсонь ульцяснон аймакса мольфтеви кудонь строямась, тоза эряма сай лама од семья. Ошень власттненди эряви арьсемс, коза молихть тонафнема Васенко ульцяса строяви ипотечнай кварталонь эряйхнень идьсна. Ули школань строямаса вешфкс и ламоц райоттнень эса. Тяниень пингть мольфтеви школать строямац Краснослободскяй районца, ушеткшневи строямась Торбеевскяй райононь Дракина велеса. А сембоц кота кизоста Мордовияса строяви кота од школат. Марса эсост кармай тонафнема 3 тежятть стирня и цераня.
Россиянь Президентть В.В.Путинонь решениянц коряс 2020 кизоста сявомок тевс нолдави «Земскяй учитель» программась. Фкя миллион цалковаень лувксса фкя пингонь выплатать кармайхть получама педагокне, конат сайхть работама вели и емла ошу.
Мордовиясь занцесыне васенце васттнень странаса асу шабатнень ширеснон кирнеманц коряс. Эрь кизоня касонды Всероссийскяй олимпиадатнень эса тонафниеньконь сатфксонь сатнемасна. Меля синь занясть 49 призовой васта. «Эрь шабать сатфксоц» федеральнай проектть вельде тя работась должен лихтевомс од уровеньц. Тядде республикаса панжеви «Сириус» центрать опытонц мяльс сявондезь асу шабатнень мархта работать коряс Центра. Стане жа республикань Оцюнясь путсь задача тядде панжемс лицей Мордовскяй госуниверситетть видеса и арьсемс пединститутть видеса тяфтама тонафнемань заведениянь панжемать колга.
Тяка пингть Владимир Волков китькстазе: асу шабатнень мархта работась эряви мольфтемс синь сяда товолдонь профессиянь кочкамаснон мяльса кирнезь. «Тяса кафта оцю задачат, конат миньцонк мзярс кальдявста решандавихть. Васенцесь: сембе асу шабатне, конат аделазь странань инь цебярь вуснень, должетт мртцемс Мордовияв, коса синь муйхть работа специальностьс коре. Теест работань мумась лядонды республикаса оржа прябалакс. Правительствась, минь хозяйствующай субъектоньке пцтай
мезевок аф тиендихть тя ширеса. Сяс Правительствати, Минпромнаукати марса предприятиятнень мархта эряви арьсемс тянь колга, - мярьгсь республикань вятись. – Омбоцесь: программатне и методикатне, конат аноклафт асу шабанди лицейса, должет улемс сувафтфт тевс республикань сембе школатнень эса. Сяс мес асу шабатне тонафнихть аф аньцек лицейса, эздост пяк лама простой школатнень эса, тяконь лувксса и велеса».
Мордовиянь Оцюнясь лятфтазе: Россиянь Президентсь путсь задача одкстоптомс профессиональнай образованиять, сувафтомс тевс практико-ориентированнай программатнень. «Мон корхнень ни, что каждай образовательнай учрежденияти эряви шарьхкотькшнемс, кодама киге сон кармай касондома-вииякшнема. Но мзярс лац шарьхкотьф профиль мархта колледжнень ули кода лувомс сурса», - мярьгсь Владимир Волков.
Республикань Оцюнясь китькстазе: эряви тонафнемс российскяй и международнай цебярь опытть. Оцю интерес эвондафниЧелябинскяй трубопрокатнай заводть «Будущее белой металлургии» образовательнай проектоц. «Тя цебярь пример сянди, кода шарфтомс бизнесть мяленц профообразованиять виияфнеманцты. Тяда башка, меля республикань делегациясь ульсь Темпера финскяй ошень кафта колледжса. Студенттне работайхть афкуксонь стройкаса, стройсихть эрямань поселкат, конат меле мишендевихть. Омбоце колледжсь козякофтф козякофтф пяк цебярь оборудованияса, кона макси возможность теенза пяшкотькшнемс закаст промышленнай предприятиятненди», - отмечазе Владимир Волков.
Мордовиянь Оцюнясь путсь задача Минобразованиять инголе кочкамс республикань тонафнемань заведениятнень, конатнень видеса ули кода етафтомс эряфс ня проекттнень.
Культурась, спортсь, туризмась
Лама задача сави решандамс «Культура» нацпроектть рамкаса. Маластонь кота кизотнень республикаса арьсекшневи строямс и тиемс капитальнай ремонт велень 23 учреждениянди, козякофтомс тяниень пингонь оборудованияса культурань 70 организация. Тядде ни аделама Оцю Березникса культурно-досуговай центрать и большеигнатовскяй Культурань кудть.
«Театры – детям» федеральнай проектть рамкаса тядде тиеви капитальнай ремонт Някань Государственнай театрати, одкстопт-козякофтф «Крошка» театрать материально-техническяй базац.
2018 кизонь инь мяляфтови событиякс арась спортсменоньконь сяськомасна. Тя Южнай Кореяса Олимпиадать эса Анастасия Седовать «бронзац», Аргентинаса юношескяй Олимпийскяй налхкоматнень эса велоспортть коряс Варвара Овчинниковать «золотац» и, конешна, Артем Сурковонь и Сергей Емелинонь Венгрияса миронь чемпионатса триумфсна. Мордовиянь представительхне тага куцсть пьедесталонь инь вярьцек куцеманятненди, а республикать спортивнай сатфксонзон колга тага кармасть корхтама разнай кяльса масторть келес.
Мелянь главнай спортивнай событиякс республикань Оцюнясь азозе футболть коряс миронь чемпионатть и китькстазе, што фкя инь васенце задачась тячи – сяда курокста кярьмодемс чемпионатонь наследиять концепциянц эряфс етафнеманцты. Фкя инь васенце кизефкссь – Саранскяйса федеральнай уровенень идень футбольнай центрать панжемац.
Кода китькстазе республикань вятись, футболть коряс миронь чемпионатсь лездсь ламода виияфтомс регионть туристическяй индустриянц. «Эряви сяда товга виияфнемс республикать брендовай маршрутонзон, арьсекшнемс отт, нолнемс тевс емла и средняй бизнесть ресурсонзон. Минь соотечественниконьке шарфнихть мяль Эрьзянь, Сычковонь творчестваснонды, васттненди, конат сотфт Ушаковонь и Пугачевонь лемснон мархта. Омба масторонь инжихне эрявихть содафнемс национальнай козяшиньконь мархта: мокшэрзянь ярхцамбяльхнень, тавлинскяй налхкшть, урусовскяй валенцятнень, темниковскяй матрешкать и лиятнень», - мярьгсь Владимир Волков.
Мордовиянь Оцюнясь путсь задача Спортонь, од ломанень политикань и туризмань министерствать инголе тиемс сембе эрявиксть сянкса, штоба сувафтомс республикать «Арзамас – Дивеева – Саров» туристическяй кластерти.
Президентть майскяй указоц
Фкя инь васенце задачакс властень сембе оргаттненди, кода китькстазе республикань Оцюнясь, арай Президентть майскяй од указонц пяшкотькшнемац.
«Тя оцю задачат, конатнень решандамасна ламода полафтсы цебярь шири республикань и странань эряйхнень эряфснон. Мордовиясь участвондай 56 федеральнай проектса, - мярьгсь Владимир Волков. – Кота кизоста нацпректтнень рамкаса республикась получай пцтай 58 миллиард цалковай – тя кафтонь-крда сяда лама сянь коряс мзяра нолдафоль регионть
виияфнеманкса Мокшэрзянь народть Российскяй государствань лия нароттнень мархта ладязь эрямстост 1000 кизонь топодеманцты, и 1,5-крда сяда лама футболть коряс миронь чемпионатти анокламанкса нолдаф ярмакнень коряс».
Мордовия Республикань Оцюнять пресс-службац