24 майста Саранскяйса ётась Мордовиянь Технопаркть заседанияц, конань работаса участия примасть региональнай экономическяй интеграциянь кизефкснень коряс Российскяй Федерациянь Президентть советникоц С.Ю.Глазьев, Мордовия Республикань Оцюнять тевонзон нюрьхкяня пингс тиендисна В.Д.Волков, содаф российскяй ученайхне, РАН-нь академикне, тяконь лувксса Технопаркть Научно-техническяй советонц председателец Е.Н.Каблов и лиятне.
Научно-техническяй советонь участникне ванозь ламоц кизефкснень, конат сотфт «Технопарк-Мордовия» АУ-нь НТС-ть 2016 кизонь 12 майста ётафтф заседаниясонза примаф решениятнень пяшкотькшнемаснон, а стане жа инновациятненди конкуренциянь кирни экономикать виияфнемаса фкя инь эрявикс вийи—вешфксть касфнеманц мархта.
—Мекольдень вете кизотнень Мордовиянь Технопарксь НТС-ть мархта марстонь работать вельде сатсь оцю сатфкст,—азозе В.Д.Волков.—Сон занцесы 7 вастть Россиянь 100 инь цебярь Технопаркнень ёткста. Оцю путкс путни народнай хозяйствань отраслятнень и целайнек республикать виияфнеманцты. Технопарксь примась участия волоконнай оптикань кластерть пуроптомаса, светотехникаса инголи оцю аськолкснень тиемаса. Башка мяль шарфневи асу шабатнень мархта работати. Ладяф сотрудничества РОСНАНО-ть мархта. Технопаркса нолневи 6 миллиартт цалковаень питнеса продукция, конань анокламаса заняф кафта тёжяньда лама ломань.
Кода азозе Мордовиянь вятись, предприятиятне, конатнень мяльсна вииякшнемс, тонаткшнесазь инновационнай производствать. Республикась занцесы васенце васттнень странаса инновационнай продуктать пяльксонц коряс, кона тяни пачкодсь 28 процентс.
«Промышленнай производствась кассь 7 процентта, велень хозяйствань производствась – 7 процентта, ВВП-сь – 4 процентта. Заработнай платась кассь 6,5 процентта, - азозе Владимир Волков. – Тяддень кизоть васенце кварталста промышленнай производствать индексонц касомац пачкодсь 20 процентс, 6 процентта – велень хозяйствась, касондыхть основной капиталти инвестициятне».
Корхтамок асу од ломаттнень мархта работать колга, В.Д.Волков лятфтазе Асу шабанди Республиканскяй лицейть, кона арась республикати инновационнай площадкакс. Тяса тонафнихть отраслянь сай пингонь специалисттне, конат вешевихть тячиень экономикать мархта.
«Российский фонд фундаментальных исследований» ФГБУ-нь советть председателец В.Я.Панченко азозе, што од учёнайхнень ули возможностьсна получамс фондть лезксонц, башка ся проекттне, конатненди вийс коре решандамс башка регионть социально-экономическя прябаланзон.
С.Ю.Глазьев эсь докладсонза китькстазе, што кризисонь аф тёждя пингстовок Мордовиясь коль вииякшни. Тяса лац пяшкотькшневихть Россиянь Президентть мархта путф задачатне, конат сотфт касондомань инновационнай кити стяшендомать мархта.
—Мордовияса аф юксневи, што васенце вастса, тяконь лувксса и производстваса лядонды ломанць,—мярьгсь С.Ю.Глазьев.—Республикаса сявф виде курс асу од ломаттнень виияфнемаснон лангс.
Заседаниять пингста В.Д.Волков казсь Технопарконь Научно-техническяй советонь кой-кона члеттненди государственнай казнет. Тяфта, Славань III степенень орденца казьфтольхть «Санкт-Петербургский исследовательский университет информационных технологий, механики и оптики» ВО-нь ФГАОУ-ть ректорсь В.Н.Васильев и академиксь В.Я.Панченко. «Заслуженный деятель науки Республики Мордовия» званиясь максф РАН-нь академикти Е.Н.Кабловонди.