29 сентябрьста Мордовия Республикась и Сбербанк ПАО-сь кемокстасть соглашения Bank of Business Partners (“Банк бизнес-партнеров») платформать марса виияфнеманц коряс соглашения. Бизнес-партнеронь банксь – тя питнефтома онлайн-площадка омба масторонь партнерхнень вишендеманкса, масторть келес товаронь и услугань мишендеманкса. Кагодть кемокстазь Мордовия Республикань Оцюнясь Владимир Волков и Сбербанк ПАО-ть Мордовскяй отделениянц Управляющаец Елена Страшкевич. Пуромксса стане жа ульсь Сбербанк ПАО-ть Вице-президентонц – Сбербанк ПАО Волго-Вятскяй банкть Председателец Петр Колтыпин.
Bank of Business Partners платформать Сбербанксь няфтезе 2017 кизонь ноябрьста. Специализированнай сайтса можна няфнемс информация эсь компанияцень и нолневи продукциять колга, содафнемс поставщикнень предложенияснон мархта, а стане жа получсемс питнефтома консультацият банковскяй сопровождениять коряс.
«Платформать целец – международнай рынкаса российскяй предпринимательхнень продукцияснон содафокс тиендемац. Сон пяк эрявикс ся компаниятненди, конат заняфт международнай бизнесса», - азозе Елена Страшкевич соглашениять кемокстамста.
Мордовиянь Оцюнясь Владимир Волков китькстазе, што Сбербанксь республикать цебярь партнероц ламоц проекттнень эряфс етафнемаса: «Мекольдень колма кизотнень Мордовиясь касфтозе экспортть 2,5-крда 4 миллиардста сявомок 10 миллиарттненди молемс. 2018 кизоть васенце пялестонза – касомась нинге 21 процентта. Тяниень пингть экспортть коряс минь работатама 80 страна мархта. Тяда башка, футболть коряс Миронь чемпионатсь макссь республикати возможность сядовок кемокстамс
внешнеэкономическяй соткснень. Мундиальти анокламста и етафтомстонза минь етафтоме переговорхт ся странатнень представительснон мархта, конатнень сборнайсна налхксть Саранскяйса. Кеман, што «Банк бизнес-партнеров» платформась арай вешевикс сервисокс республиканскяй предприятиятненди, конат лисендихть омба масторонь рынкатненди».
Тяниень пингть ресурсть эса кемокстаф 15 тежяньда лама партнер 136 странаста, тяконь лувксса Россиясь, Китайсь, США-сь, Индиясь, Австралиясь, Великобританиясь. Ресурсти лихтьф предложениятнень марстонь лувкссна 8 тежяньда лама.
Петр Колтыпин спасибась Владимир Волковонди Мордовиять территорияса Сбербанк ПАО Волго-Вятскяй банкть лидеронь конференциянц етафтоманкса: «Спортивнай и ошень инфраструктурась и тяниень пингонь и пяк цебярь, сон максси возможность Мордовиять столицанцты примсемс разнай уровенень мероприятият. И Сбербанксь оцю мяльса нолдазе тевс тя возможностть!»
Стане жа васедемаса корхтафоль Мордовия Республикать и Сбербанк ПАО-ть марстонь работаснон колга, тяконь лувксса льготнай ипотечнай кредитованиянь программать, эряма вастонь строямать, промышленностьса и аграрнай производстваса инвестиционнай проекттнень эряфс етафнемаснон коряс. Васедемаса примась участия МР-нь Правительствать Председателец – финансонь министрсь Алексей Симонов.