Форумть деловой программац лемтьф государственнай паршиень эрязста вятемати, кадастрань учетонь тефнень оптимизациянь и пара тевонь эсьотям сёрматфтомати, недвижимостень коряс инвестициянь проекттнень топафтоманцты, инфраструктурань виияфтомаса и ломанттнень эряфснон цебярьгофтомаснон коряс кизефкснень ваномаса. Колмоце форумть повесткаса панчф од и эрявикс направления – территориятнень марстонь виияфтомасна. Сессияса пуромфненди пшкядсь Республикань Оцюнясь Артём Здунов и мярьгсь, што корхтаманди панчф тя площадкась сатсь международнай виияфтома, форумсь салай мяльснон содаф и ёню эсксперттнень, отрасляса шарьхкоди профессионалхнень, сон максы возможность тиевомс содавиксокс омба масторонь коллегатнень масторланга кочкаф инголи моли опытснон и градостроительнай виияфтомать коряс содамошиснон эса.
«Минь шарьхкодьсаськ, што эрь кодама-бди вииямась тяччи аш кода ётафтомс цифровой технологияфтома. Цифровизациянь процеснень публичнай собственностть вятемаса минь сатсаськ Росимуществать мархта. Ведомствать кирдеманц вельде республикаса тиеви промышленна парк и экономикань башка зона, ушетф инвестиционнай проекттнень топфтомасна ташта производственнай цехнень юрса», – мярьгсь региононь руководительсь.
Мордовиясь эрязста покоди Росреестрать мархта, кона ушедсь цифровой сембе систематнень марс кочкамок, конат кочкавихть «Национальная система пространственных данных» фкя платформать лангса геопространственнай даннайхнень коряс. Тевс нолдамась моли аф ламонь-аф лама, а шумордамац арьссеф 2030 кизоть самс. Республикась сувась проектти «варжамань» регионть лувксса 2023 кизоста сявомок, тяни НСПД-са пяшкотьфт региононь информационнай систематне. Ульсь азф, фкявок платформа, кона пяшкотьф инь вии тяниень пингонь цифровизацияса, аф кармай работама виде куляфтома. Росреестрась топафты оцю и эряви тев – субъекттнень мархта марса кочкамс фкас недвижимость колга сембе кулятнень. Сембе тя арафтф территориятненди мяльс туф инвестициятнень и налогонь потенциалть касфтомаса. Башка мяль шарфтфоль форумть лувксса тяфтама кизефксть лангс, кода велень хозяйствань модатнень тевс нолдамасна. Аньцек Мордовияса мекольце кизотнень велень хозяйствань оборотс нолдаф 60 тежянь малава гектар мода.
«Сембось, мезсь сотф модать, ведть мархта, канды оцю талика масторлангть и обществать инголе. Ламоц кизефксне социальнай и политическяй сталмотнень коряс минь ба валхтолеськ апак ватт. Серьгядян эсонт форумса покодемать пингста шарфтомс мяль технологичнай кизефкснень лангс и арьсемс стака вешфкснень эзда кит-ятт – тя ули обществати оцю лезкс», - мярьгсь Артём Здунов.
Форумонь модераторсь, Высшай школань правоведениянь Президентскяй академиянь РАНХиГС декансь Олег Зайцев шарфтсь мяль, што форумсь колмоце кизось пуроптсыне марс эксперттнень: «Мордовия Республикась эрь кизоня мялень салазь и мяляфтовиста васьфти эсонк и максы эрьгя тевонь содазь пяшкодемс кизефкснень ладямаснон, а форумсь арась эсьлацонь площадкакс. 30-да лама сотф арьсефксне шумордавсть 80 % тевс путф вешфксса». Сон мярьгсь, што форумть пингста башка мяль шарфтови омба масторонь опытть лангс, инь вии и удалаф мировой практикатнень тевс нолдамаса. Олег Зайцев тяфта жа азсь сюконяма валхт Мордовия Республикань Оцюняти Артём Здуновонди пефтома лезксонкса «Мастор» модати лемтьф форумть кирдеманкса.
Росимуществать руководителенц полафтыец Михаил Попов корхтась доклад мархта РФ имущественнай мяльхнень араламаснон колга. Росреестрань руководителенц полафтыец Татьяна Громова азондсь Россияса национальнай системать пространственнай даннайхнень коряс виияманц колга: «Минь арьсетяма цебярь тифт пространственнай даннайхнень тевс нолдамаснон коряс васендакиге ломаттненди лезксонь максомаса. Тя масторть инвентаризацияц – теенк эряви содамс , мезеньке минь ули и мезе нинге эряви сувафтомс экономическяй обороти. Кочкафне фалу эрявихть кирдемс тевса!» тяфта жа сон азсь нинге форумонь участникненди сюконяма вал Росреестрань вятить Олег Скуфинскяень пяльде.
Доклад мархта «Космос для России: комплексный мониторинг территорий и ресурсов для социально-экономического развития регионов РФ» корхтась «Терра Тех» генеральнай директорть васенце полафтыец Максим Болтачев. «Модась – тя актив. Сон фалу виияй и аньцек эста, мзярда минь содасаськ мезе ульсь мархтонза, кода сон полафни. И тяса теенк космоссь лезды « сатомс ня содамошитнень и вятемс ня процесснень», - шарфтсь мяль спикерсь.
Тяфта жа пленарнай сессияса пшкядема мяль-валхт азсть Таджикистан, Турция, Объединеннай Арабскяй Эмиратонь, Южно-Африканскяй Республикань представительхне.
Форумса ульсть ванфт марстонь мяльс саф вешфксне, конатнень алу путозь кядьснон Мордовия Республикань Правительствать и «МАРТ» Международнай Ассоциациянь Развитиянь Территориять ёткса. Тя соглашениясь няфтьсяне аф фкя лацонь соткснень кемокстамаснон территориять устойчивай виияма сфераса и синь тевс нолдамань смузьснон касфтомасна.
Форумть покодемац мольфтевь тематическяй секциява. Омбоце шиня сон ётафтови круглай шра вакса, кона марса арьсеф Новосибирскяй область модань и имуществань Департаментонц мархта.
Мордовия Республикань Оцюнять Пресс-службац