Лятфтасаськ, што февральть песта Каланчакскяй округста делегациясь ульсь Мордовияса. Республикань и округонь культурань учреждениятнень ёткса ульсь тяшкстаф мзярошка марспокодемать колга соглашения.
Мордовиянь Оцюнясь китькстазе: тяфтама сотрудничествась подшефнай округонь эряйхненди пяк эряви.
Культурань министрсь Светлана Баулина азондозе, што делегациять примазь пяк лац: «Тейнек шашнесть Каланчаконь эряйхне, азонкшнезь мяльснон-арьсемаснон – Мордовиясь арась теест пяк малакс».
Округса ащемать пингста артисттне макссть колма концертт – сембе синь ётасть аншлаг мархта.
Каланчакскяй округонь Велень культурань кудонь и библиотекань покодихненди ульсть ётафтфт тонафтомань семинархт «Семья» од нацпроектть видеса, Пушкинскяй картать покодеманц организациянц коряс, проектса и грантовай пялькстомаса участиять, синь ётксост заявкань тяштемать коряс. Светлана Баулина китькстазе: министерствась кармай фалу кирдема соткст подшефнай территориянь коллегатнень мархта, ётафнема образовательнай семинархт ВКС-нь режимса.
Каланчакса совсем аф кунара панчф краеведческяй музей, и тяни учеви марстонь покодема сонь экспозициянзон и фондонзон пяшкодемаснон коряс.
Тяда башка, республикань культурань учреждениятне «КультураZаПобеду» проектть видеса кочкасть коллегатненди лезкс – книгат, канцелярскяй принадлежностть, налхкшт, ноутбук, концертнай костюпт и лама лия. Мордовиянь художниконь Союзсь кучсь Каланчаку од живописецень работаста выставка.
Тяфта жа ня шитнень этасть артисттнень мархта боецнень васедемасна – сон токазень сембонь седиснон. Военнослужащайхнень лемс концертть этафтозь Мордовиянь творческяй коллектифне и однополчаниттне. Мокшэрзянь государственнай филармониять директороц Сергей Кузьмин азондозе: «Якамать эзда впечатленияда – пяшксе! Геройнеконь лемс покодемста, артисттне марязь эсь эрявиксшиснон, цераттненди мероприятиять важностенц».
«Торама» фольклорнай ансамбльть директороц Андрей Николаев китькстазе, што «Торама»-ть коллективоц ётафтсь СВО-нь зонаса военнослужащайхнень лемс 50 концерт. Тяни артисттне пачфтезь боецненди 1253-це мотострелковай полкть знамянц, конанц эса ётнихть служба Мордовияса шачихне, а тяфта жа землякненди гуманитарнай лезкс.
Тяфта жа китькстасаськ, што Мордовияв лямбе койть коряс кизонь ваймамас сась Каланчакскяй округста идень группа. Светлана Баулина азсь мяль тердемс Каланчакста делегациять «Мы вместе» Сембероссиянь национальнай культурань од ломанень фестивальти, конац ётай августста. Артём Здунов тя инициативать кирдезе.
Мордовия Республикань Оцюнять пресс-службац