Эрь пингть сонцень героенза. Фкясь синь эздост Андрей Сергеевич Кузнецов. Рузаевкаса шачф-касф цёрась школать и ПТУ-ть шумордамда меле служась армияса, аделазе Новосибирскяй военнай институтть и Омскяй военнай академиять. Шабакскиге занцесь пря спортса, получазе армейскяй рукопашнай тюремать коряс Россиянь спортонь мастеронь званиять.
Эряфонь смузькс эстеенза лувондозе Родинать интересонзонды служамать. Тянь колга корхтайхть сонь казненза: Андрей Сергеевич – Мужествань колма Орденонь кавалер, сонь послужной спискасонза «Отечествать инголе заслуганкса» 2 степенень орденць, «Сирияса военнай операциянь участникти» РФ-нь Оборонань министерствать медалец и «Военнай службаса отличиянкса» 2 и 3 степенень медальсь.
13 августста Андрей Сергеевич геройкс шавовсь, пяшкотькшнемок воинскяй долгонц СВО-ть пингста. Подвигонц инкса кулмдонза меле казьф Мужествань Орденца.
Эсь аф кувака эряфонц пингста Андрей Сергеевич сатсь лама казне. Сон максозе инь питнить минь тинь мархтонт инксонк, воляшить, Родинаньконь инкса – эсь эряфонц. Минь карматама маряма гордость и мяляфтомонза Андрей Сергеевичень. Валда сембе пингонь мяляфтома геройти!» - мярьгсь республикань руководительсь Артём Здунов.
Мордовиянь Оцюнясь стане жа азозе, што спортивнай турнирсь, кона тядде ётафтовсь Рузаевкаса Андрей Кузнецовонь лятфнеманкса, эряви тиемс эрь кизоннекс, шять, максомс теенза республиканскяень статусть.
Ломанць тяштезе прянц великай странать историяс, штоба минь мархтонт, полаткшнемок сонь подвигонц, улелеме сувереннайхть и виихть», - мярьгсь Саранскяй и Мордовскяй Митрополитсь Зиновий.
«Андрей ульсь эсь пингонь геройкс, арьсесь аф сяшкава эсь колганза, кода Отчестванц судьбанц инкса. Инь оцю казнекс теенза кармай минь тинь мархтонт мяляфтоманьке!» - мярьгсь Андрей Кузнецовонь племянницац Дарья Королёва.
Мордовиянь Оцюнясь Артём Здунов и военнослужащайть тядяц Лидия Владимировна панжезь мемориальнай доскать. Минута кашт аф молезь ащезь лятфтазь воинскяй долгснон пяшкодемста шавфнень. Пуромфне путсть панчфт Андрей Кузнецовонь лемс доскати.
Марса геройть радня ломанензон мархта Артём Здунов ульсь класса, коса Андрей тонафнесь, тяни тяса сонь лемозонза ладяф «Героень парта», кабинетть эса латцефт сонь фотографиянза. Эсь героическяй учениконц колга азондсь класснай руководительсь Татьяна Викторовна Саркина. «Андреенди военнай службась ульсь оцю мялькс и эряфонь смузькс. Марян гордость, што Монь ульсь тяфтама ученикозе!» Лидия Владимировна азозе: «Андрей шабакскиге корхнекшнесь – карман разведчикокс! Тяфта и лиссь…»
Мордовия Республикань Оцюнять пресс-службац