Тядде Краснослободск славнай ошти топоди 456 киза пуроптомстонза. Красная Слобода лем ала острогть видеса велеста сон арась козя история и мазы кой мархта ошекс. Краснослобрдецнень поздравляндама Ошень шить мархта 15 августста сась Мордовиянь Оцюнясь Артём Здунов. Сон макссь питне тястонь лицейть капремонтонц мольфтеманцты и ванозе промышленнай производствать.
Тячи Краснослободскяйсь кемоста вииякшни. Нацпроекттнень вельде, конатнень азозень странань Президентсь, строяви эряма васта, одкстопневихть образованиянь, здравоохранениянь, культурань, спортонь учреждениятне, инженернай инфраструктурась, петневихть-мазопневихть общественнай пространстватне. Сяда тов мольфтеви кинь инфраструктурать виияфнеманц, промышленностть и АПК-ть ширеснон кирдеманц коряс работась, пуропневихть од рабочай вастт.
Мекольце этапса тяни ащи Краснослободскяй лама профилень лицейть капитальнай ремонтоц. 1981 кизонь колма этажса зданиясь одкстоптови «Народнай программать» и «Молодёжь и дети» нацпроектть вельде. Пцтай 126 миллион цалковай нолдаф аф аньцек зданиять помещениянзон петеманкса, но и школьнай мебелень, классненди, актовай залу оборудованиянь рамаманкса и образовательнай пространствань оформляндаманкса.
Артём Здунов макссь питне ётафтф работатнень качестваснонды и корхнесь педагокнень, тядятнень-алятнень и сай пингонь ученикнень мархта.
Лицейса ладяф профильнай тонафнема естественно-научнай и технологическяй профильхнень коряс, панчфт цифровой образовательнай средань кабинетт и Ростонь Точка. Улихть кадетскяй, юнармейскяй и поисковай движеният, покодихть «Патриот» клубсь и ки лангонь движениянь од инспекторонь отрядсь.
Петемать пингста тифт панжада вастт, коса ули кода переменатнень пингста налхксемс шахматаса, ётафтомс пинге оцю компанияса команднай работань зонаса. Лицейса улихть аф аньцек информатикань, но и цифровой образовательнай средань урокт - тяса шабатнень ули возможностьсна получамс содамошит и касомс-вииямс IT ширеса. Лицейсь получась грант школьнай музейть одкстоптоманкса.
Директорсь Елена Голубева китькстазе: «Зданиясь васенцеда строямдонза меле няезе петемать. Ётай кизонь ноябрьста сявомок полафтоськ тяса пцтай семботь! Тиеме рекреационнай пространстват проектнай тевонди, ваймамати, пцтай марнек полафтоськ мебельть, рамаме интерактивнай панельхть, профильнай кабинеттненди оборудования, петеськ актовай залть. Лицееньконди тяни ули кода пялькстомс республикать столицанц ламоц школанзон мархта. Сюкпря тяфтама возможностенкса педагогоньконди и иденьконди».
Мекольце вете кизотнень лицейсь васенце вастса Краснослободскяй районца сяськихнень и призёрхнень лувксснон коряс школьниконь Всероссийскяй олимпиадать республиканскяй этапсонза - 41 сяськи и призёр аньцек ётай тонафнемань кизоня. Тя корхтай организациять цебярь образовательнай базанц и вии педагогическяй составонц колга.
1 сентябрьста пцтай 600 идь, конатнень ёткса 38 васенце классонь тонафни и 21 выпускник, ушедсазь тонафнемань од кизоть тяниень пингонь цебярь условияса.
Мордовиянь Оцюнясь варжакстсь начальнай школань кабинетти - педагогсь тядде ушедсы васенце классонь тонафнихнень тонафнемаснон.
«Монць инголи тонафнень тя школаса. Тядде стирнязе моли васенце классу. И пяк кеняртькшнетяма, што школась получась тяшкава оцю одкстоптома! Арьсян, эрь шабась тяфтама школав кармай молема оцю мяльса!» - мярьгсь васенце класса тонафнить тядяц Елена Колушева.
Подряднай организациясь, кона мольфтьсы школаса капремонтть, тяфта жа шумордасы Краснослободскяйса Центральнай районнай библиотекать и Од ломанень центрать - Краснослободскяень од ломаттнень асушиснон касфтомаснонды тяниень пингонь пространствать одкстоптомаснон.
Районца вииякшни производстватнень эзда фкясь - «Промметизделиянь» Заводсь («Верстакофф» брендсь). Предприятиясь специализировандай металлическяй мебелень и автоматизированнай ванфтомань системань нолдамать коряс. Заводть продукцияц пачфневи сембе странать келес, маластонь омба масторонь странатненди и ялгаксшинь странатненди.
Заводсь эрязста нолясыне тевс МР-нь Предпринимательствать ширенц кирдемань фондть и РФ-нь Промышленностень виияфтомань фондть механизмаснон. Тя лезды планц коре одкстопнемс оборудованиять и тиендемс производственнай од линият. Тячиень шити производствати нолдаф ни 375 миллион цалковай, планца - сай кизонди пачфтемс тя цифрать 500 миллион цалковайти.
Республикань Оцюняти няфтезь од цехть, коса тифт архтомань, шуфтонь обработкань, сваркань, профилированиянь линият. Гендиректорсь Игорь Силин азондозе, тяни предприятияса трудендай 170 лама ломань. Артём Здунов кизефтсь од рабочай васттнень и кадрань анокламань системать колга. Тяниень инвестпроектть эряфс ётафтоманц видеса кармай тиф 50 малава высокотехнологичнай покодема васта.
Тя ваймамань илань шиня краснослободецне пуромсть райцентрань одкстоптф центральнай площади, штоба марса поздравляндамс кельгома ошснон. Мордовиянь Оцюнясь макссь питне центральнай площадть петеманцты-мазоптоманцты, ванозе од арт-объектть - Краснослободскяень историческяй центрать металлическяй картанц 20 векть ушетксста. Велень пирьфса няфтьфтольхть Краснослободскяй райононь народнай промыслатне, национальнай кухнясь и ламось лиясь, кайгсть народнай морот.
Шумбракстомок ошень эряйхнень мархта, Артём Здунов китькстазе: «Ёфси курок ни Краснослободскяи ули 500 киза. Тейнек лама тиема, штоба сят, кит кенерихть шачемс, а мон кеман, тяфтамда кармай лама, маряльхть гордость аф аньцек историять, но и ошть тяниень пингонц инкса. Лама содаф ломань лиссь краснослободскяй модаста - оцю сюкпря, што ванфтость историять и мялямть! Старандатама лездомс районть инфраструктуранц одкстоптомаса. Главнайсь тяни тиемс семботь, штоба сяськолеме, кирдемс сятнень ширеснон, кит передовойсот! Сюкпря сембонди теенть - бизнести и эрти эздонт - лезксонкса».
Республикань руководительсь макссь казнет педагокненди, дорожникненди, социальнай работникненди, медикненди, муниципальнай служащайхненди, культурань работникненди. Мордовиянь Оцюнять Благодарностензон получазь Куликовскяй культурань кудть «Рябинушка» вокальнай ансамбльсь и Евгений и Анастасия Савиттнень лама идень семьясна. Мирттне-рьвятне касфтыхть кота итть! Краснослободскяй районца эряй 185 лама идень семья, конатнень эса касфтови 600 лама идь. Пцтай 70 ня семьятнень эзда -Краснослободск ошень эряйхне.
Земляконзон приветствовандазень и Краснослободскяй районца шачфсь-касфсь, РФ-нь Сенаторсь, Россиянь финно-угорскяй народонь Ассоциациять председателец Петр Тултаев: «Славнай, сире и мазыдонга мазы Краснослободск ошса ушеткшнине трудовой кизень. И фалу сюконязь лятфнине и лятфнесайне ся ломаттнень, кинь ваксс, Шкайть мяленц коряс, повонь, и кие лездсь тейне советса, тевса и смузьшиса. Краснослободскяйсь и сембе сонь эряенза фалу ащесть странать, эсь ошснон, эсь республикаснон интересснон инкса, кемазь и видеста служасть Отечествати. Седи ваксста сембонь поздравляндатядязь тя илать мархта!»
Стане жа поздравляндамань валхт азсь МР-ть эзга Росгвардиянь Управлениять начальникоц Андрей Каринкин. Сон максозе казнеть «Торгово-производственная компания «Верстакофф» ООО-ть генеральнай директоронцты Игорь Силинонди.
Мордовиянь Госсобраниять эзда краснослободецнень поздравляндазень депутатсь Кузьма Самолькин, спасибась теест трудонкса и родной крайти вернайкс улеманкса.
Краснослободскяй райононь оцюнясь, СВО-нь ветеранць Иван Волков спасибась республикань руководствати районти мялень шарфтоманкса, социальнай инициативатнень и инфраструктурнай проекттнень ширеснон кирдеманкса.
«Пара улель тя шиня азомс, што ошеньке фалу ульсь труженикокс, военнай и мирнай история мархта гордостень маряй крепостекс, сон содафоль эсь трудонц, эряензон мархта. Тячи мялезе арьсемс семьянтенди пара эряф, сетьмоши и сембе цебярть. Главнайсь, штоба аляньке-цёраньке сяда курокста мрдальхть, и сяськомась улель мельганк!»
Мордовия Республикань Оцюнять Пресс-службац