12 августста ётафтовсь Мордовия Республикань Оцюнять Артём Здуновонь виде линияц.
Регионть руководителец виде эфирса азондсь республикати инь эрявикс ширетнень и Мордовиянь командать мархта ётафневи работать колга благоустройствать и строительствать, экономикать и туризмать виияфнемаснон, СВО-нь боецнень ширеснон кирдемаснон и семейноцентричнай политикать, шумбраста ламос эрямань движениять виияфнеманц коряс.
Артём Здунов китькстазе, што федеральнай центрать–Россиянь Президентть Владимир Путинонь и странань Правительствать ширень кирдемаснон вельде Мордовиясь ётафни эряфс эрявикс инфраструктурнай и социальнай проектт. Сембе синь водендафт ломаттнень эряфснон качестванц касфтоманцты.
Эряйхнень эзда саф пшкядематнень васенце темасна–китнень петемасна, коммунальнай инфраструктурать одкстоптомац, общественнай транспортть покодемац, петемась-мазоптомась, Мордовиянь райоттнень эса школатнень и социальнай инфраструктурать покодемасна. Виде эфирть пингста прябалань кизефкснень ваномаснонды видеосвязть коряс полаткшнесть региональнай властень органонь и местнай самоуправлениянь органонь руководительхне.
Аф сембе кизефксне азфтольхть виде эфирть пингста, но сембе улихть ванфт Мордовиянь командать мархта–каршезост ответт республикань эряйхненди сайхть. Прябалань васттнень машфтомаснон коряс работась кармай мольфтевома властень органонь представительхнень и общественникнень мархта марса.
Мзярошка пшкядема региононь руководительсь мярьгсь сявомс личнай контрольс Саранск ошень округонь оцюняти Владимир Быковонди. Ошень власттненди лездома анокт самс Саранскяень инициативнай эряйхне. Граждаттнень эзда поступась и кой-мзяра мяль-арьсема, конат сотфт столицать петеманц-мазоптоманц мархта - Артём Здунов кирдезе ширеснон и мярьгсь сявомс синь работас.
Виде эфирть трансляциянц эсь ресурсснон вельде ётафтозь «Мордовия» ГТРК-сь, «Народное телевидение Мордовии» телеканалсь, ВК-са и ОК-са «Республика Мордовия» официальнай пабликне. Тяда башка, текстонь виде трансляциять обеспечендазь «Известия Мордовии» газетась, республикань СМИ-тне и блогерхне.
Мордовия Республикань Оцюнять Пресс-службац