Артём Здунов китькстазе: «Республикась целенаправленна покоди региону турпотокть касоманц лангса, ётафневи пяк лама событийнай мероприятия».
Результатть улихть – кизоть ушетксста турпотоксь кассь колма пяльксс. Кассь гостиницань пяшкодемась, общественнай питаниянь сферать эса касонды предприятиянь лувкссь. Тяка пингть Мордовиянь руководительсь китькстазе, што сервисонь уровеньць тожа должен касомс, гостеприимствань сферась должен молемс пингть мархта фкя пильгс, фалу виензакшнемс. Национальнай республикаса туристтненди интересна аф аньцек содамс мокшэрзянь народть культуранц и коензон мархта, но и варжамс национальнай ярхцамбяльхнень. Аньцек аф фалу и аф сембе общепитонь учреждениятнень эса ули кода тя тиемс. Тянь ширде ули пеняцяма дажа «Мордовское подворье» национальнай ресторантть покодеманц лангс.
Мезе эряви тиемс, штоба цебярьгофтомс отраслять состояниянц – тянь колга корхтасть васедемать пингста.
Республикаса гостеприимствань индустриянь предприятиятненди госкирдемань ули мератнень колга и тя сферати кадрань анокламать колга азондсть Мордовиянь экономикань, мишендемань и предпринимательствань министрсь Иван Горин и МР-нь образованиянь министрсь Елена Солдатова.
«Солнце и Луна» ресторантть директороц Ирина Мордовина сюконясь республикань Оцюняти гастрономическяй фестивальть ётафтоманц инкса. Сон азондозе, што общепитонь предприятиянь кирдихне ашесть учсе тъняра ломань. «Минь няеме лама мяль вельде саф и павазу ломатть и шарьхкодеме, што ётафнемс тяфтама фестивальхть эряви», - мярьгсь сон.
Индивидуальнай предпринимательсь Василий Курочкин явсь эсь бизнесонц покодеманц мархта. Сонь мишендемань точканза мишендихть национальнай ярхцамбяльхть, и синь лангозост ули спрос. «Мокшэрзянь пачатне лац эсь пряснон няфтезь. Якатама экспедицияс велетнень ланга, кочксетяма мокшэрзянь ярхцамбялень рецептт», - азондсь сон.
Васедемань итокнень коряс ульсь примаф решения сувафтомс гостиприимствань региональнай стандарт. Рестораторонь республиканскяй ассоциациясь кармай сяда крхкаста покодема СПО-нь учреждениятнень мархта, конат аноклайхть отраслять лемс кадрат.
Вице-премьерсь Батыр Эмеев, конац республикань Оцюнять поручениянц коряс мольфтьсы Инсарть набережнаенц обустройствань ширенц «Мордовия Арена» стадионтть видеса, китькстазе: сай кизоть тя вастсь кармай сувафтф событийнай календарьти, ошень власттне тиихть тяса порядка, штоба сон араль цебярь ваймама вастокс.
Мордовия Республикань Оцюнять пресс-службац