Коллегиять ушедомда инголе республикань школань и лицеень тонафнихне няфтезь эсь проектнай работаснон. Кой-конат ёткстост афкукс инновационнайхть. Кепотьксонди, Асу шабанди республиканскяй лицейста Антон Трошин няфтезе «Точка зрения» Брайлень принтеронц — аппаратть сон тиезе сонць и мярьгсь, што школать шумордамда меле сонь мялец ушедомс сонь производстванц. Артём Здунов проектть ширенц кирдезе и азсь мяль аф кадондомс одувонди практическяй эряфс ётафтоманц: «Можна максомс заявка «Умник» программас коре грантонь получаманди. Мяльсь пяк цебярь — тиемс стартап-студия и ладямс аппаратть ноляманц», - мярьгсь Мордовиянь Оцюнясь Артём Здунов и мярьгсь Образованиянь министерствати лездомс заявкань анокламаса.
Коллегиять ушедомста сонь участниконзон приветсвондазень РФ-нь Просвещениянь министерствань средняй профессиональнай образованиянь и профессиональнай тонафнемань сфераса государственнай политикань Департаментть директороц Виктор Неумывакин: «Образованиянь сембе уроветтнень коряс Мордовиясь занцесыне васенце васттнень. Республикать пяк цебярьхть сатфксонза профессиональнай
образованиянь системаса, профориентацияса».
Образованиянь сферать работань итогонзон и сай пингонди задачанзон колга доклад тись министрсь Елена Солдатова. 2023 кизоня отраслять виияфнеманкса нолдаф 3,3 миллиард цалковай федеральнай средства, ётай кизоть коряс тяса сяда лама 650 миллион цалковайда.
Министрсь азондсь воспитательнай процессонь главнай ширетнень колга. «Важнайть колга корхнематне», «Идькспингонь навигатор» проектсь, конань мяльса кирдезь эряфс ётафневихть шабатнень инициативасна, «Мордовия Республикаса иттнень и од ломаттнень духовно-нравственнай воспитаниясна» программась, кона ётафневи эряфс марса Мордовскяй митрополиять мархта, «Героень Парта» патриотическяй проектсь — тя тячиень школать эряфоц.
Азфоль, што «Шабатнень и од ломаттнень маштомошиснон и асушиснон мушендомань, ширень кирдемань и виияфнемань системать эффективностенц» показателензон коряс ётай кизонь итокнень коряс Мордовиясь занцесы омбоце вастть Россияса. Республикась — колмоцесь странаса Школьниконь всероссийскяй олимпиадать заключительнай этапонц эса участвондамать итогонзон коряс.
Корхтамок профориентациять колга, Елена Солдатова азозе: Мордовиянь Оцюнять поручениянц коряс эрь средняй школать мельге кемокстаф опорнай предприятия. Путф ушеткс апак лотксек тонафнемать вельде профориентациянь корпоративнай модельти: идень садсь — школась — техникумсь — вузсь — производствась. Тифт ни кафта линият — марса «Талина» ГП-ть и «Биохимик» АО-ть мархта.
СПО-нь системати ниле кизоста поступась пцтай 1 миллиард цалковай — ремонтонди, тяниень пингонь оборудованиянди, сотрудникнень тонафнемаснонды и стажировканди.
«2023 кизось — эсь лацонне образованиянь системати — Россиянь Президентсь азозе сонь Педагогонь и наставниконь кизокс. Республикаса аноклаф мероприятиянь целай комплекс, но фкя инь васенцесь — тиемс семботь, штоба профессияти сашендоль кода можна сяда лама од учитель», - мярьгсь Елена Солдатова.
Вуснень и образованиянь региональнай системать марстонь тевонь вятемаснон колга азондсть Н.П.Огарёвонь лемса МГУ-нь ректорсь Дмитрий Глушко и М.Е.Евсевьевонь лемса МГПУ-нь ректорсь Марина Антонова.
Мордовиянь Оцюнясь кирдезе Виктор Берюковонь ширенц сянь коряс, што производственникненди обязательна эряви примсемс участия профессиональнай образованияти и профориентацияти лемтьф мероприятиятнень эса.
Мордовияса «Движение первых» иттнень и од ломаттнень российскяй движенияснон колга азондсь региональнай отделениять советонц председателец Дарья Радайкина.
«Россиянь Президентть ширень кирдеманц вельде ётай кизось ульсь козя республикань образованиянь системати. Минь кода можна сяда келиста ноляськ тевс вииякшнеманкса возможносттнень, конатнень макссесыне федеральнай центрась», - мярьгсь Артём Здунов, тиемок итокт заседанияти.
Ётай кизоть сяда тов поладовсь отрасляса тяниень пингонь инфраструктурать тиендемац. Госпрограммать мяльса кирдезь капитальнайста петьф 13 школьнай зданиясь. 1 сентябрьста одкстоптф школатне панчсазь эсь кенькшснон.
Азфоль, што кой-кодама аськолкст инголи тифт образовательнай средать цифровизациянц коряс — вешфкснень мяльс сявозь оборудовандаф региононь нинге 27 школась, панчф кванториум Саранскяень 33№ школать видеса.
Республикаса кярьмотьф нинге 2 школань строямати: 600 вастонди Саранскяйса и 165 вастонди од корпусть Ромодановскяй райононь Белозерье велеса. Шумордама лангса Саранскяйса 1450 вастонди школать строямац.
Кда корхтамс школьнай спортивнай площадкатнень колга, мониторингсь няфтезе, што нльна Саранскяйса улихть школат, коса аш спортивнай объектт. Тянь лангс, Артём Здуновонь валонзон коряс, эряви шарфтомс башка оцю мяль.
Башка поручения максфоль школьнай музейхнень работаснон коряс. Мзярс ПФО-нь школьнай музейхнень окружной конкурссост республикась 14-це вастть эса. Мордовиянь Оцюнясь макссь поручения петемс тя ситуациять.
«Целайнек республикань педагогическяй сообществать работац аф кальдяв. Оцю сюкпря работанкса!» - мяррьгсь меколи Артём Здунов. Коллегиять шумордамста сон макссь казнет образованиянь сферань работникненди.
Мордовия Республикань Оцюнять пресс-службац