Васенце задачатнень ёткста фкясь — пси линиять тевс нолдамац — каналсь оперативнай, улема, кармай работама шинек-венек.
«Мезень колга пичедихть боецне, мзярда минь корхнеме?» Семьяснон, рьваснон, идьснон, сире тядяснон-аляснон мельге карматама ванома. Сяс тяшкава важна кирдемс ширеснон, лездомс кудса эрь кодама тевса: вятемс шабать школав, лазондомс пенгат, пачфтемс поликлиникав, рамсемс рамафкст. Тянь эзда, тяконь лувксса, ащи боецнень настройсна», - китькстазе региононь руководительсь.
Эрь районца должен улемс пуроптф штаб. Тяда башка Артём Здунов шарфтсь мяль патриотическяй мероприятиятнень эрявиксшиснон лангс. Посылкань кочкамать коряс пункттнень пуроптомасна стане жа может улемс путф районнай штапнень лангс.
Студенческяй студотряттненди мярькф арьсемс кода полафтомс рабочай васттнень народнай хозяйстваса. Важна аф лоткафнемс работатнень национальнай проекттнень эряфс ётафтомаснон коряс.
МР-нь спортонь и од ломанень политикань министрть васенце заместителец — од ломаттнень тевснон коряс Управлениять начальникоц Анастасия Гришнёва кемокстазе, што волонтёрскяй движениясь аф весть ни арсесь виень пуроптома вастокс. «Кода аш мзярдовок, тя аф тёждя пингть минь задачаньке — пуроптомс марс вийхнень и кирдемс ширеснон сятнень, кинди тя эряви», - мярьгсь сон.
Васедемать пингста Артём Здунов стане жа азондсь региональнай госвластень структураса полафткснень и МР-нь од ломаттнень тевснон коряс Государственнай комитетть пуроптоманц колга, конанди максовихть МР-нь Спортонь и од ломанень политикань министерствать полномочиянза. «Од ломаттнень инголе ащихть оцю задачат, тя эздост арась сяда лама, сяс саф мяльс тиемс башка орган, кона кармай заняф идькспингонь, од ломанень кизефкснень мархта, а стане жа кармай вятемонза идень общественнай организациять, кона пуроптф Россиянь Президентть инициативанц коряс», - мярьгсь сон.
Мордовия Республикань Оцюнять пресс-службац