Мероприятиясь кочкась тёжянть малава участник Россиянь ламоц региоттнень эзда. Главнай темась - иттнень духовно-нравственнай касфтомасна.
«Мархтонт эрятама башка пингста, но тя веши эздонк и башка ответственность сянкса, мезе тиенттяма, эрсь эсь вастсонза. Башка ответственность -педагокнень, сятнень эзда, кит касфтыхть од ломатть. Пяк оцю ответственностсь - духовенствать лангса, мес и духовенствати вешфксне тячи касфтфт стане, што ингольдень поколениянь батюшкатне афи арьсихть, мзяра кизефкс пшкятькшни теест приходскяй тефнень ладямаснон коряс. Но тя сембось афкукс эряви сянкса, штоба тейнек марса решандакшнемс сембе прябалатнень, конат нинге ащихть народоньконь кинц лангса. И кеман, што тяфтама пуромксне, кода тя, служайхть общественнай отношенияньконь цебярьгофтомаса пара тевти и лездыхть задачатнень пяшкодемаса, конат тячи ащихть странать инголе и ламотнень эздонк», – китькстазе Москувонь и сембе Русень Святейшай Патриархсь Кирилл.
РФ-нь просвещениянь министрсь Сергей Кравцов азсь благодарностень валхт мялень фалу шарфтоманкса, конань Рузонь православнай церькавсь шарфнесы воспитандамань, образованиянь, историческяй просвещениянь кизефксненди и странаньконь традиционнай питнишинзон араламаснонды.
«Кизефксне, конат сотфт традиционнай духовно-нравственнай питнишитнень мархта, тячи пичефтьсазь эрь учительть. Сянь эзда, кода касфтсаськ касы поколениять, ащи странаньконь сай пингоц. Россиянь Президентть поручениянц коряс воспитаниясь мрдась школатненди. Тячи примафт единай образовательнай программат сембе предметтнень коряс, воспитандамань единай программат, аноклакшневихть единай учебникт. Тя фундамент, конань лангса строяви Россиянь образовательнай единай пространствась, национальнай идентичностеньке и культурно-ценностнай суверенитетоньке. Шарфнетяма мяль учительхнень ширеснон кирдеманцты, педагогонь профессиять содафокс тиендеманцты – педвузса конкурссь пачкотькшни 12 ломанти вастти. Эрявикс деятельностень направленияньке и сатфксоньке обязательна муйхть васта образованиять виияфтоманц Стратегияса, конань разработкац мольфтевсь профессиональнай сообществать мархта», – китькстазе Россиянь Минпросвещениянь оцюнясь.
Васедемать аноклазь религиознай образованиянь и катехизациянь Синодальнай отделсь и Российскяй Федерациянь Просвещениянь министерствась.
Мероприятиясь ётафтфоль Церькавть и образовательнай сообществать ёткса диалогть кемокстаманкса, иттнень и од ломаттнень духовно-нравственнай касфтомаснон ширеса виень пуроптоманкса и педагогическяй сообществать ширенц кирдеманкса.
Васедемань участникнень ёткса - колма педагокт Мордовияста. Чамзинкаста 1№ лицеень историянь и обществознаниянь учительсь Галина Труханова аф весть лисендсь сяськикс «Образование» нацпроектть видеса РФ-нь инь цебярь учителень конкурсса. Галина Анатольевнань учениконза примсихть участия ламоц мероприятиятнень эса.
Светлана Мирончевать кядяла Чамзинкань 1№ лицейса работай школьнай историко-краеведческяй музей. Сон аф весть лисендсь сяськикс и призёркс эрь кодама конкурснень эса, а 2020 кизоста сявомок арась Москувонь Победань Музейти партнёркс и примси участия «Школьный музей Победы» программаса.
Саранскяень 36№ школань биологиянь и химиянь учительсь Наталья Буянкина 39 киза макссь педагогонь тевти. Мекольдень кизотнень аноклась биологиять и экологиять коряс школьниконь Всероссийскяй предметнай олимпиадань региональнай уровенень вете призёрхт. Наталья Михайловна - «Мир возможностей» партийнай проектонь акциянь школьнай куратор.
Мордовия Республикань Оцюнять Пресс-службац