12 августста «Мордовия‑Арена» стадионца ётафтовсь Футболть коряс Россиянь Кубкань региоттнень Киснон омбоце раундонц матчец, коса васедсть «Шумбрат» саранскяень футбольнай клубсь и 2DROTS медийнай командась.
Налхкомась лиссь драматичнайкс и кирдезень болельщикнень таколодомаса мекольце секундатненди. 25 минутаста «Шумбратть» нападающаец Артём Молодцов лихтезе эсь команданц инголи - счётсь арась 1:0 паксянь азорхнень ширес.
Тайматнень ёткста республикань Оцюнясь Артём Здунов болельщикнень овацияснон коряс казезе Мордовияста СВО-нь ветеранонь командать - синь арасть «Стальная воля» адаптивнай футболть коряс всероссийскяй турниронь вице-чемпионкс, кона ётафтовсь Нижняй Тагилса 30 июльста сявомок 1 августти молемс. Кубкась максфоль капитанти и командать нападающаенцты Андрей Кокоревонди.
Инжихне маштсть лац налхкома омбоце таймати компенсировандаф пингста: Антон Полюткинонь виде эрьхтеманц ладязе таблоса итоговай 1:1—тяфта шумордавсь васедемань основной пингсь. Сай раундти путёвкать судьбац решандавсь матчта мельдень пенальтинь серияса. 2DROTSнь футболисттне ульсть цють сяда кемот и видет—сериясь аделавсь 5:4 счётса синь ширезост.
Тяфта, инжиень командась лисенди Россиянь Кубкань региоттнень Киснон колмоце раундозонза. Соперниксь кочкави «Муром» ФК-ть и липецкяй «Металлургть» ёткса матчть итогонзон коряс. «Шумбрат» ФК-ти Россиянь Кубкаса выступлениясь тя этапса шумордавсь.
Мордовия Республикань Оцюнять Пресс-службац