Етай ваймама шитнень Мордовиянь Оцюнясь ульсь республикань райоттнень эса. Еткшиста, 11 майста, Владимир Волков ульсь Старошайговскяй, Краснослободскяй, Торбеевскяй райоттнень эса, коса мольфтсь корхтама оцюнятнень мархта территориятнень виияфнемаснон колга.
Старошайговскяй районца Мордовиянь Оцюнясь ванозе яровой и озимой культурань видефнень. Тяниень пингть яровойхнень видемасна республикаса пцтай шумордаф: зерновой и зерно-бобовай культуратне видефт 283 тежянь гектар площадьса, сахарнай якстеряпссь – 22 тежянь гектар площадьса. Владимир Волков няезе, што модась сатомшка начка. Хуш аграрийхне учендыхть пизем. Республикань Оцюнясь китькстазе, што погоднай условиятне тядде аф простойхть, сави путомс лама вий, штоба получамс цебярь урожай. Сембе эрявикссь тянкса ули: видьмот, удобреният, техника, грамотнай специалистт.
Райононь оцюнять Геннадий Мухинонь мархта корхтамась мольфтевсь аф аньцек велень хозяйствань тефнень колга. Корхтафоль кинь строямать квалма. Тядде ушедови работась старошайговскяй кафта китнень лангса, конатнень коряс накаснень республикань Оцюняти максозь избирательхне. «Безопасные и качественные автомобильные дороги» национальнай проектть рамкаса тядде арьсекшневи петемс 4,3 вайгяльбень кувалмоса автомобильнай кит Од Акшино велеста сявомок Рудня велети молемс и тиемс капитальнай ремонт райцентраса Октябрьскяй ульцяса. Нацпроектть рамкаса кинь строямась поладови и сай кизоть – петеви кись Мельцаны велеса и Кулдымса калма лангть маласа. Сембоц вете кизоста Старошайговскяй районца петеви региональнай значениянь 91 вайгяльбень кувалмоса кит.
Краснослободскяйса Владимир Волков ванозе кода мольфтеви од школать строямац. Тяниень пингть работатне шумордама лангсот. Колма этажса зданиять эса тонафнемань колма блокт, спортзал, актовай зал, медицинскяй блок, васенце классонь тонафнихненди налхксема комнатат, столовай и пищеблок. Стане жа проектс коре тяса кармай ваймосемань зона, универсальнай спортивнай площадка, ласькондемань киня мархта футбольнай пакся, учебно-опытнай зона сад и пере мархта.
«Важна, штоба од школась оснащенияс и тевс нолневи технологиятнень, методикатнень и программатнень коряс улель тяниень пингоннекс. Тяса
стане жа должен улемс идень технопарк», - мярьгсь Владимир Волков. Стане жа республикань вятись китькстазе, што башка мяль эряви шарфтомс тонафнихнень мархта аф школьнай работать лангс.
Од школать маласта территориясь должен арамс Краснослободскяй районти ваймосемань нинге фкя вастокс. Сяс Владимир Волков макссь поручения лацкас арьсемс зданиять цветовой и дизайнерскяй решениянц. Тяка пингть ванфтомс тястонь историческяй застройкать, зданиять, конань оцю архитектурнай питнишиц и значенияц райононь эряйхненди.
Бобылевские Выселки велеса республикань Оцюнясь ванозе единай спортивнай комплексть строяманц, кона мольфтеви велень территориятнень виияфнемаснон коряс Россиянь Минсельхозть программанц рамкаса. Комплекссь кармай многофункциональнай, тяса ули ледовай арена, бассейна, тренажернай и гимнастическяй залхт. Синь кармайхть примсема ломатть колма районцта – Краснослободскяй, Ельниковскяй и Темниковскяй.
Стане жа республикань Оцюнясь ульсь 6330 ава тувонди свиноводческяй комплексть строяма вастса Слободские Дубровки велеса. Проектсь максы пцтай 200 рабочай васта и экологическяй ширде безопаснай тяниень пингонь од производства Краснослободскяй районть территорияса.
Торбеевскяй районца Владимир Волков ванозе «Атяшевский» МПК-ть производственнай од площадкать строяманц коряс оцю проектонц эряфс етафтоманц мольфтеманц. Од мощносттнень тевс сувафтомасна, мезсь арьсеф тядденди, максы возможность агрохолдинкти нолнемс кизонь потмоста 240 тежянь тоннада лама колбаснай продукция.
Республикань вятись китькстазе, што проектсь лезды аф аньцек келептемс агрохолдинкть производственнай мощностензон, но и панжемс цебярь зарплата мархта од рабочай вастт.
Мордовия Республикань Оцюнять пресс-служба