Миртть-ръват Алексей и Анна служайхть внутренняй тевонь органса: Анна – кинолог, Алексей – эксперт-криминалист. Семьянь оцюнясь сонць лама идь мархта семьяста, авац шачсь Москуса, велень эряфть колга мъзярдовок ашезь арьсе, но Алексеень мархта васедемась полафтозе сонь эряфонц. Синь марстопнесыне фкя идькс пингонь мечтась – кафцьке ёмластокиге арьсесть лемдемс эсь эряфснон порядкань ванфтомати и преступность каршес ащемати. Тяни синь лац тиендьсазь и эрявикс покодемать и сисем идень касфтомать.
15 июльста полицейскяй семьять мархта васьфтьсь Мордовиянь оцюнясь Артём Здунов.
«Тя кизось минь аф эсь лацонь – Президентсь лемдезе сонь семьянь Кизокс, а республикаса минь лемдеськ сонь трудовой династиястненди. Няфтемань конкурсь – «Полицейская семья». Мялезе содамс тинь арьсеманттень колга участиять и сяськомать эзда, въдь эрь пялькстомась – тя оцю пичедема», - шумбракстозень Максимовнень семьяснон Артём Здунов.
Алексей азондозе, што пичефкс ульсть, но пяк лездсть ломаттне, конат примсесть участия интерактивнай вайгялень максомаса, аф аньцек Мордовияста, но и сембе странаста. Тя и кандозе почетнай колмоце вастть.
Регионтть руководителец шарфтсь мяль: кода синь сембонь кенерькшнихть тиемс.
«Сембось лиседи сюконямок монь авазти Аннанди – сонь ваноманцты и мяленцты. Службанди монь тушенды ламошка пингозе. Сянкса хозяйствась сидеста сонь лафтувонзон лангса. Иттне тожа лездыхть», - азондозе семействань оцюнясь.
Максимовнень лама жуватадост: казат, учат, саразт, утат, потяф лофцста синць тиендихть ланга, вай, сыра. Оцю пересост касфнихть эрь кодама культурат. Фкя фкянди лезксфтома тяса мезевок аф лиси!
Оцю цёрасна Александр уже музе эсь специальностенц – тонафни СПО-нь учрежденияса. Аляц азондозе, што лангсонза ащихть техникань петемать коряс обязанносттне – цёратит тя мала. Полина, Никита и Вера – школьникт, Надежда – вандыень первоклассница, Иван и Люба якайхть идень саду. Ули семьять марстонь мялень салай тевсна – кизонда, ваймама шиста якайхть калонь кундама, тялонда курькснихть соксса, кельгсазь морамать.
«Арьсян, што ломаттне, конат максозь эсь вайгяльснон Максимовнень инкса, тисть цебярь выбор! Важна, што минь ведомствасонок улихть тяфтама цебярь оцю семьят. Молодецт, кирдеда марс!» - поздравляндазень награда мархта РМ коряс потмонь тевонь министрсь Юрий Поляков.
Алексей и Анна Максимовне арьсихть, што синь прявкс сатфксна – синь идьснон шачемасна, тяста и марстонь тефне, и марстонь пингонь ётафтомась, и вандыень шить колга арьсематне. Дружнай семьяти сяввихть сембе панда прятне! Поздравляндатядязь и «Полицейская семья» фотопялькстомать эса сяськомать мархта!
Мордовия Республикань Оцюнять пресс-службац