Мордовиянь Оцюнясь Владимир Волков етафтсь рабочай васедема «Биохимик» ПАО-ть генеральнай директоронц Денис Швецовонь мархта. Корхтамась мольфтевсь заводть 2016 кизоня работань итогонзон и сай пингонди планонзон квалма. Васедемаса участия примась республикань Правительствать Председателенц заместителец – промышленностень, наукань и од технологиянь министрсь Александр Седов.
Денис Швецовонь валонзон коряс, 2016 кизоня «Биохимикти» удалась етафтомс эряфс инголенза путф сембе задачатнень. Тяниень пингть заводсь работай стабильнайста, товарнай продукциянь производствань объемтне меля кассть 26,5 процентта и пачкодсть 2,2 миллиартт цалковайс. Отмечафоль, што 2016 кизоня «Биохимиксь» етафтсь 200 миллион цалковай налогонь и лия пандоматнень инкса, 80 миллион цалковайсь эздост поступась Мордовия Республикать консолидированнай бюджетс.
Предприятиять 2017 кизонди планонзон еткса – мощносттнень сяда товолдонь одкстоптомасна, заработнай платать касфнемац, од рабочай вастонь панжемась. Мордовиянь Оцюнясь отмечазе производственнай од корпусть строяманц шумордаманц эрявиксшинц. «Тевс объектсь сувафтома тядде, а сяда тов – лисема продукциянь нолнемать коряс 5-6 миллиартт цалковай кизоти проектнай мощностьс. Пяк важна, што од производствась максы ошень эряйхненди нинге 130 высококвалифицированнай рабочай васта», - китькстазе Владимир Волков.
Стане жа корхтамась мольфтевсь «Антибиотики» научно-производственнай объединениять работанц колга. Лятфтасаьк, мелянь декабрь ковста Саранскяйса Российскяй Федерациянь здравоохранениянь министрть Вероника Скворцовать и промышленностень и торговлянь министрть заместителенц Сергей Цыбань участияснон мархта кемокстафоль колма ширдень соглашения республикань Правительствать, «Биохимик» заводть и Мордовскяй госуниверситетть еткса сотрудничествать квалма.
Денис Швецов отмечазе, што 2017 кизоня научно-производственнай объединениять видеса арьсекшневи анокламс антибиотиконь ниле од субстанцият, конат сяда тов кармайхть нолневома «Биохимикса».
Мордовиянь Оцюнясь Владимир Волков тага весть китькстазе: «Од антибиотикнень производстваснон коряс проектть стратегическяй значенияц сембе странати, сяс республикати сон башка эрявикс!»
Мордовия Республикань Оцюнять Пресс-службац