Мордовиянь Оцюнясь Владимир Волков 26 сентябрьста етафтсь рабочай васедема Мордовия Республикать эзга Россиянь Пенсионнай фондть отделениянц управляющаенц Владимир Василькинонь мархта. Корхтафоль республикань эряйхнень пенсионнай обеспеченияснон колга, тяконь лувксса законодательстваса полафткснень мяльс сявондезь, конатнень примазень РФ-нь Государственнай Думась.
Лятфтасаськ, «О национальных целях и стратегических задачах развития Российской Федерации на период до 2024 года» Россиянь Президентть Указонц пяшкотькшнеманкса маластонь пингть путневи задача обеспечендамс пенсиятнень касомаснон инфляцияда оцюкс. Пенсионнай кизотнень касфтомасна лезды касфтомс аф работай пенсионерхнень пенсияснон средняйста 1 тежянь цалковайс ковти Российскяй Федерациять келес.
2019 кизонь 1 январьста сявомок аф работай пенсионерхнень пенсияснонды тиеви индексация 7 процентта.
Тяда башка, 1 январьста сявомок 25 процентта касфтови аф работай пенсионерхненди, конат эряйхть велеса и синь аф 30 кизода кржас работасть велеса, страховой пенсияснонды фиксированнай выплатась.
Мордовиянь Оцюнясь башка китьктсазе, што эряви лац-ряц азомс ломаттненди пенсионнай законодательствати сувафтф полафткснень колга. «Пенсионнай фондонь Отделенияти стане строяма эсь работац, штоба ломаттне нюрьхкяня пингста получселезь сембе информациять», - шарфтсь мяль Владимир Волков.
Пенсионнай фондонь региональнай отделениять управляющаец пачфтсь республикань Оцюняти тядянь капиталонди сертификаттнень максомаснон колга. Сембоц программать эряфс етафнемста синь получазь 40 тежяньда лама семьясь. Ламошкасна нолдазь средстватнень эрямань условияснон цебярьгофнеманкса. Мордовиянь Оцюнясь отмечазе тя программать оцю социальнай значениянц и кошардсь тиемс семботь, штоба семьятненди улель кода можна сяда курокста прважамс получаф средстватнень эряма вастонь рамаманкса.
Стане жа васедемаса корхтафоль Мордовия Республикать социальнай программанц эряфс етафнеманц колга, конань софинансированияса примай участия Пенсионнай фондсь. Тя программать рамкаса Пенсионнай фонду прважавихть средстват пенсионерхнень компьютернай грамотностти тонафнеманкса, а стане жа социальнай объекттненди ремонтонь тиеманкса. Тяфта, 2017-2018 кизотнень Фондсь прважась 100 миллион цалковайда лама Ельниковскяй районца Старотештелимскяй психоневралогическяй интернатть од корпусонзон строяманкса. Учендови, што тя объектть строямац шумордави тяддень кизоть аделавомс.
Мордовия Республикань Оцюнять пресс-службац