Мордовиянь Оцюнясь Владимир Волков етафтсь рабочай васедема Саранск ошень округонь оцюнять Петр Тултаевонь мархта. Корхтамась мольфтевсь ошень хозяйствать и инфраструктурать виияфнеманц колга.
Республикань Оцюнясь макссь порученият Первомайть и Победань шить праздновандамаснонды ошть благоустройстванц и аруяфтоманц коряс. Стане жа корхтафоль Россиянь и Сан-Маринонь сборнайхнень еткса футболть коряс Европань чемпионатть отборочнай матченц примаманцты Мордовиять столицанц анокламанц колга. Петр Тултаев азозе Владимир Волковонди, што тиф сембе эрявикссь, штоба тиемс ошса афкуксонь ила, лямбста примамс-васьфтемс инжихнень, кода тя ульсь меля Саранскяйса миронь чемпионатонь матчнень етафтомста.
Башка мяль пуромксса шарфтфоль автомобильнай китнень петемаснон и идень саттнень и школатнень строямаснон лангс.
Республикань Оцюнясь китькстазе, што эряви касфтомс ки лангонь работатнень качестваснон, кемокстамс пяшкодемаснон мельге контрольть, а стане жа касфтомс подряднай организациятнень ответственностьснон. Корхтафоль «Безопасные и качественные автомобильные дороги» национальнай проектть рамкаса тядде пяшкодеви ремонтнай работатнень колга.
Владимир Волков башка лоткась идень саттнень строямаснон лангс. Июнь ковста панжевихть идень кафта садикт: Химмашса Татьяна Бибинать ульцяса и «Юбилейный» эрямань комплексть ветеце микрорайонцонза Сураева-Королевонь ульцяса. Ноябрьста тевс сувафтови Титовонь ульцяста идень садсь. Стане жа корхтамась мольфтевсь Луховка и Ялга поселкатнень эса од дошкольнай учреждениянь строямать колга.
Корхтамок школатнень строямаснон колга, республикань Оцюнясь путсь задача тядде анокламс проектно-сметнай документациять кафта объекттнень лангс: Фурмановонь ульцяса 800 вастонди школать и «Юбилейнайть» нилеце микрорайонцонза 1450 вастонди школать лангс.
Мордовия Республикань Оцюнять пресс-службац