25 ноябрьста торжественнайста панчфоль «Реконструкция и строительство автомобильной дороги до аэропорта г.Саранска» объектсь. Автомобильнай од кить панжезь Мордовиянь Оцюнясь Владимир Волков и Федеральнай дорожнай агентствать вятиец Роман Старовойт.
Мордовиянь Оцюнясь китькстазе. што од кись строяф Россиянь Президентть В.В.Путинонь лезксонц вельде. Оцю лезкс макссь и Федеральнай дорожнай агентствась. Тя кить и ламоц од транспортнай развязкатнень вельде, конат строяфт Саранскяйса, 2018 кизонь футболть коряс миронь чемпионатонь болельщикне и инжихне теждяста и курокста пачкодихть аэропортть эзда стадионти.
«Автомобильнай од кить строямста тевс нолневсть строямань тяниень пингонь технологиятне и материалхне, - азозе эсь выступлениясонза Владимир Волков. – Арьсефоль транспортнай безопасностсь. Тяни тейнек эряви эсь пингстонза шумордамс пассажирскяй терминалть, взлетнай полосать строямаснон и панжемс тя комплексть футболть коряс миронь чемпионатти».
Кода отмечазе Мордовиянь Оцюнясь, тяни кинь инфраструктурать строямац мольфтеви ламода сяда курокста 2018 кизонь футболть коряс миронь чемпионатти анокламань программать рамкаса тиеви лия тефнень коряс.
Роман Старовойт поздравляндазень республикань эряйхнень од кить панжеманц мархта. «Тячиень мероприятиясь – тя эрявикс пялькс кинь строямать коряс ся оцю работатнень эзда, конат вятевихть республикаса Владимир Дмитриевич Волковонь руководстванц ала. Кеман, Мордовияти вийс коре етафтомс эряфс строямать коряс оцюдонга оцю платтнень, и тянь тинь аф весть ни няфнесть. Федеральнай дорожнай агентствась кафта кизода пингта инголе пачфтезень нормативнай состоянияс сембе федеральнай китнень, конат ащихть республикать территорияса», - отмечазе Роман Старовойт.
Торжественнай церемонияса строительхне получасть казнет республикань Оцюнять и Росавтодоронь вятить кядьста.
Мордовияв рабочай поездканц рамкаса Роман Старовойт ванозе кода мольфтеви аэропортовай комплексть реконструкцияц, а стане жа од китнень 45 вастонди строяви стадионть маласта.
Справкась:
Аэропортти вяти кить кувалмоц – 3,5 вайгяльбе. Эздост 1,1 вайгяльбесь – реконструкция, лядысь – одс стояф. Кить малава тифт пешеходнай тратуархт и велосипеднай киня. Строительно-монтажнай работатне объектть эса ушетфтольхть 2015 кизонь августста. Объектть питнец – 213 миллион цалковай.
Восточнай обходть кувалмоц – 16 вайгяльбе, сон сотнесы Саранск- Ульяновск кить и Саранск – Рузаевка кить Николаевка и Ялга поселкатнень маласта. Строямась ушетфоль 2013 кизоня, шумордамс сонь арьсеви 2017 кизонь декабрьста.
Тяниень пингть тевс сувафтомс лядсь 6,5 вайгяльбень кувалмоса участкать, коса кармай вете седень сооружения, тяка лувксса Инсарть и машина кить туркс 400 метрань кувалмоса седсь-эстакадась и Саранск – Рузаевка кить вельхкска «обжатый клеверный лист» транспортнай развязкать составса 100 метрань кувалмоса путепроводсь.