Мордовия Республикань Оцюнясь Владимир Волков 29 майста етафтсь рабочай васедема Рузаевскяй райононь оцюнять Вячеслав Кормилицынонь мархта. Корхтамась мольфтевсь территориять социально-экономическяй виияфнеманц колга. Тяконь лувксса корхтафоль социальнай объекттнень строямаснонды анокламать квалма: Рузаевкань Паровознай ульцяса 160 вастонди идень садть, Татарскяй Пишля велеса 250 вастонди школать, фельдшерско-акушерскяй пунктть.
Ванфтольхть кизефксне, конат сотфт районца водоснабжениянь и водоотведениянь системать одкстоптоманц, а стане жа «Безопасные и качественные автомобильные дороги» национальнай проектть рамкаса китнень петемаснон и строямаснон мархта. Тядде, кода азозе Вячеслав Кормилицын, нормативнай состоянияс вятевихть 13 вайгяльбень кувалмоса китне.
Стане жа корхтафоль од предприятиятнень работаснон колга, конат эвондасть сяда меле, кода Рузаевкати максфоль инголяй социально-экономическяй касондомань-вииякшнемань территориянь статуссь (ТОСЭР). Маластонь пингть панжеви производства ингольдень клянцеконь заводть площадканц лангса.
«Клянцеконь производствать эреклафтоманц лангс минь шарфнеме башка оцю мяль, и минь сатоськ тянь, - китькстазе Владимир Волков. – Тя предприятияса тядде ни панжеви 250 рабочай васта, а сяда тов синь лувкссна касфтови 700. ТОСЭР-ть виияфнеманц рамкаса улихть и лия проектт. Тянь коряс кармай мольфтевома Правительствать, райононь и ошень руководствать марстонь работасна».
Тяка пингть республикань Оцюнясь отмечазе, што од рабочай васттне, конат панчсевихть Рузаевкаса, вешихть и сяда оцю квалификациянь специалистт.
«ТОСЭР-ти кармайхть сувсема коль од предприятият, коса эрявкстыхть грамотнай ломатть, грамотнай инженерхт. Тяса тейнек эряви арьсемс: мезе тиема, штоба рабочаеньке улельхть сяда маштыхть-содайхть, кода анокламс квалифицированнай кадрат ня предприятиятненди», - мярьгсь Владимир Волков.
Мордовия Республикань Оцюнять пресс-службац