Республикань Кудса етась Мордовиянь Оцюнять Владимир Волковонь Н.П.Огаревонь лемса Мордовскяй государственнай университетонь ректорть Сергей Вдовинонь мархта рабочай васедемац.
Ректорсь пачфтезе региононь вятити, што университетонь ученайхнень мархта меля пяшкотьфоль 280 миллион цалковаень питнеса исследовательскяй работат и нинге 60 миллион цалковаень питнеса пяшкодсть университетонь емла инновационнай предприятиятне, тя инь цебярь показательсь мекольдень кизотнень. Стане жа Сергей Вдовин азондсь кремниень карбидонь монокристалхнень обработкаснон и синтезснон коряс проектть омбоце этапонц эряфс етафнеманц колга. Тядденди арьсеф нолдамс тевс колмоце этапть, конань аделамда меле арьсекшневи получамс цебярьгофтф свойства мархта промышленнай качествань объемнай монокристалонь касомань технологиять.
Васедемаса корхтафоль и университетскяй лицейть панжеманц колга, мезсь арьсеф тядденди. Лятфтасаськ, тяфтама поручения Мордовиянь Оцюнясь Владимир Волков макссь мелянь август ковста педагогическяй конференциять пингста.
«Васенда арьсекшнетяма пуроптомс кафта кемонце класст, кажнайть эса кармай 25 ломань, - азозе республикань Оцюняти Сергей Вдовин. – Профильхне – физико-химическяй (Физикань и химиянь институтть видеса) и информационнай технологиятне и математикась (математическяй факультетть видеса). Сяда тов арьсекшнетяма кочкамс тонафнихть нинге кафта направленияс коре – языковойть, коса кармайхть тонафневома китайскяй, испанскяй кяльхне, и химико-биологическяйть. Лицейсь панжеви университетть главнай корпуссонза».
Владимир Волков надияфтсь кирдемс проектть ширенц, башка отмечамок сянь, што университетскяй лицеень выпускникне виияфтсазь российскяй и мировой уровенень олимпиадатнень эса Мордовиять эзда участниконь командать, а стане жа касфтсазь абитуриенттнень лувксснон, конат анокт высшай профессиональнай квалификациянь получамати.
Стане жа Сергей Вдовин азондсь республикань Оцюняти Ворошилова ульцяса 530 вастонди общежитиять строяманц шумордаманц колга.
Мордовия Республикань Оцюнять пресс-службац