Мордовиянь Оцюнясь Владимир Волков 3 октябрьста етафтсь рабочай васедема «Ичалковский» сыродельнай комбинатть генеральнай директоронц Николай Киреевонь и «Сармич» заводть генеральнай директоронц Александр Киреевонь мархта. Корхтамась мольфтевсь предприятиятнень, а стане жа республикаса молочнай животноводствать сяда товолдонь виияфнемаснон колга.
Корхтафоль Ичалковскяй и Инсарскяй райоттнень эса кафта од молочнай комплекснень строямаснон колга. Кажнайть эса кармай кирдевома 1200 пря потяви стада. Ичалковскяй районца комплексть строямац ушетфоль меля, тяниень пингть работатне шумордама лангсот, ушедовсь ни производствать этапонь этап нолнемац. «Дружба» велень хозяйствань предприятиясь, кона етафнесы эряфс тя проектть, содаф республикаса кода молочнай животноводстваса фкя инь эффективнайсь – продуктивностень показательхне тяса кафтонь-крда сяда оцюфт средняйста Мордовиять эзга показательхнень коряс. Тяфта, тядде фуражнай фкя траксста потяф 11,5 тежянь килограмма лофца.
Инсарскяй районца молочнай комплексть строяманцты кярьмотьф тяддень кизонда, сувафтомс сонь тевс арьсекшневи 2019 кизоть аделавомс.
Од производстватнень тевс сувафтомасна лезды касфтомс лофцонь и сыронь производствань объемтнень.
Мордовиянь Оцюнясь отмечазе республикань аграрнай отраслять сяда товолдонь виияфнеманкса молочнай проекттнень эряфс етафнемаснон эрявиксшинц. «Минь путнетяма оцю задачат агропромышленнай комплексса. Тядде эряви сатомс сянь, штоба фкя фуражнай траксста потямс 6,2 тежянь килограмма лофца, а 2022 кизоти эряви лисемс 7 тежятть килограммас. Тяниень пингонь молочнай комплекснень стройсемасна лезды сатомс арьсефть, мезень колга мон корхтань Государственнай Собранияти Посланиять эса», - китькстазе Владимир Волков.
Рабочай васедемаса примась участия МР-нь Правительствать Председателенц васенце заместителец – экономикань, торговлянь и предпринимательствань министрсь Владимир Мазов.
Мордовия Республикань Оцюнять пресс-службац