Мордовия Республикань Оцюнять Владимир Волковонь лемс сась благодарственнай серма Российскяй книжнай союзть исполнительнай директоронц Елена Старостинать эзда «Самый читающий регион в 2016 году» всероссийскяй конкурсть эса участиянь примаманкса.
Конкурса участия примасть Россиянь 84 регионць. Жюрити, конань вятезе Российскяй книжнай союзть президентоц Сергей Степашин, сувасть книжнай и библиотечнай сообществань, общественнай организациянь представительхть, журналистт, литературнай критикт и писательхть.
Жюринь члеттне макссесть оценка конкурснай заявкатненди, коза сувсесть оцю мероприятиятне, конат лемтьфт литературати, книгати и лувомати, конат етнесть региоттнень эса 2015-2016 кизотнень, а стане жа властень оргаттнень, культурань учреждениятнень книгать инфраструктуранц виияфнеманц, регионть лувондомань традициянзон ширеснон кирнеманц коряс инь эрявикс сатфкссна. Васенце вастсь и «Литературный флагман России» званиясь фкя мяльса максфт Воронежскяй области.