20 февральста Мордовиянь Оцюнясь Владимир Волков примась участия фонетикать лазернай техникань пяльксонцты материалонь производствать виияфнеманц мархта сотф кизефкснень коряс совещанияса, кона етась Мордовиянь Технопаркса Россиянь промышленностень и торговлянь министрть заместителенц Александр Морозовонь председательстванц ала.
«Тячи Россияса башка мяль шарфневи телекоммуникационнай, специальнай оптическяй волокнтнень и теест высокочистай кварцевай материалхнень производстваснонды, - отмечазе Александр Морозов.- Промышленностть модернизациянц, а стане жа странаньконь технологическяй безопасностенц обеспечендаманц пингста фкя инь важнай задачась – качественнай российскяй оптоволокнать нолдамац».
Совещаниять пингста отмечафоль, што республикаса вятеви оцю работа технологическяй инфраструктурать пуроптоманц, оцю квалификациянь кадрань анокламать, од продуктань и инновациянь нолнемать коряс.
«Мордовияса активнайста виияфневихть несколька отраслясь, тяфтапне,кода волоконнай оптикась и оптоэлектроникась, силовой электроникась, светотехническяй отраслясь. Аф фкя проект етафневи эряфс фотоникаса, конатнень башка значениясна аф аньцек минь региононьконди, но и целайнек странати», - азозе Владимир Волков.
«Оптиковолоконные системы» АО-сь – Россияса телекоммуникационнай волокнать производстванц коряс васенце заводсь, кона панчфоль 2015 кизоня, ладязе кабельнай промышленностти продукциянь нолнемать. Маластонь пингть Технопаркть видеса тевс нолдави эсь лацонь проектсь – волоконнай оптикань Инжиниринговай центрась, коса кармайхть аноклакшневома волокнань специальнай виттне, конат эрявикст лазернай и сенсорнай техникати.
«Тяниень пингть ванфт сембе эрявикс кизефксне, конат сотфт Мордовияса волоконнай оптикань Инжиниринговай центрать панжеманц мархта. Примаф полафткс мархта «дорожнай картась», коса лац-ряц азонтфт проектть эряфс етафнеманкса сембе мероприятиятне, конат эрявихть пяшкодемс 2017 кизоня. 2018 кизоти эрявихть решандамс сембе кизефксне, штоба кизоть омбоце пялестонза Инжиниринговай центрась Саранскяйса ушедольхце эсь работанц», - поладозе Владимир Волков.
ИЦВО-ть проектоц получась оцю оценка РФ-нь промышленностень и торговлянь министрть Д.В.Мантуровонь и ПФО-са Россиянь Президентть полномочнай представителенц М.В.Бабичень эзда.