Шавшиста, 4 июньцта, Мордовия Республикань Оцюнясь Владимир Волков примась участия котоце созывонь МР-нь Госсобраниять колмогемонь ветиеце сессиянц работаса.
Сессиять пингста депутаттне ванцть 15 кизефкс, тяконь лувксса Мордовия Республикаса идть праванзон коряс Уполномоченнайть колга.
Идть праванзон коряс Уполномоченнаень должностсь сувафтфоль 2010 кизоня. 2017 кизоста сявомок сон сувафтф государственнайхнень лувксс. Законопроектть мяльс сявозь, полафтови должностть лемоц (инголи –Мордовия Республикань Оцюнять видеса идть праванзон коряс Уполномоченнай), регламентировандавихть омбудсментть полномочиянза. Уполномоченнайть улихть праванза сашендомс воляшифтома кадомань васттненди, следственнай изоляторхненди, кирдемс контроль ала аф совершеннолетняйхнень праваснон и свободаснон ваномаснон и стак тов. Стане жа документть эса тяштьф полномочиястнень ушедомаснон и лоткафтомаснон колга, конатнень колга инголенди корхтама идть праванзон коряс Российскяй Федерациянь Президентть видеса Уполномоченнайть мархта.
Нинге фкя законопроектсь сотфоль трудовой законодательствать и нормативно-трудовой акттнень мяльс сявондемаснон коряс ведомственнай контрольть мархта сотф кизефкснень мархта. Документсь сувафтф Мордовиянь прокурорть мархта кода законодательнай инициатива. Документть мяльс сявозь, ладяви порядка ведомственнай контрольть коряс исполнительнай властень оргаттненди местнай самоуправлениянь оргаттненди подведомственнай организациятнень эса, тяфтамотнень кода государственнай учреждениятне, государственнай унитарнай предприятиятне, муниципальнай учреждениятне и муниципальнай унитарнай предприятиятне. Стане жа азфт-серматфт мератне, конат макссихть возможность контролирующай оргаттненди плановай и аф плановай проверкатнень пингста лихнемс лангу трудовой законодательствань колсематнень и персемс теест кить. Законопроектсь лезды сяда кемоста ванфтомс работай граждаттнень праваснон, а стане жа касфтомс учреждениятнень руководстваснон ответственностенц.
Стане жа депутаттне сувафтсть полафткст «О регулировании лесных отношений в Республике Мордовия» Мордовия Республикань Законть 2 и 3 статьянзонды и ванфоль «О создании лесопаркового зеленого пояса городского округа Саранск и о его площади» МР-нь Госсобраниять постановлениянц проектоц. Постановлениять мяльс сявозь, лесопарковай сянгяря вастть площадец кармай 1364,7 гектар.
Корхтамок документть колга, МР-нь Оцюнясь Владимир Волков мярьгсь, што аш кода формальнайста малаткшнемс тяфтама документтнень анокламаснонды, а стане жа сон эряви марса ваномс Саранскяйть и маластонза территориятнень виияфнемаснон коряс генеральнай планть мархта.
35-це сессиять работанц шумордамста, народнай избранникне кирдезь Владимир Коняшкинонь кандидатуранц Пролетарскяй райононь судьянь должностьс.