Мордовиянь Оцюнясь Владимир Волков вержиста, 5 июньцта, примась участия котоце созывонь Ковылкинскяй муниципальнай райононь депутатонь Советть аф очередной колмогемонь колмувоце сессиянц работаса. Шинь повесткань кизефкснень еткста васенце вастса ащесь Ковылкинскяй райононь оцюнять Виктор Ташкинонь полномочиянзон пингта инголе лоткафтомасна. Сон тусь отставкас эсь мяльс коре. Депутатне кирдезь решениянц ширенц фкя мяльса.
Мордовиянь Оцюнясь спасибась Виктор Ташкинонди райононь вятиень вастса цебярь работанкса. Тяфта, Владимир Волков отмечазе, што тя пингста районць сатсь цебярь результатт экономикань ламоц отраслятнень эса.
Республикань Оцюнясь китькстазе, што етай кизоть Ковылкинскяй районць аделазе цебярь результатса. Касома сатф экономикань ламоц отраслятнень эса. Промышленнай производствань объемтне кассть 7,5 процентта, основной капиталти инвестициятнень лувкссна 8,5 миллиард цалковай.
«Вете кизоста миф продукциять лувксоц кассь 36 процентта, сивольть производствац кассь 2,5-крда, лофцть – пцтай 1,5-крда, - отмечазе Владимир Волков. – Районть экономикас водендаф 11 миллиард цалковайда лама аф бюджетнай срдества, панчф 350 од рабочай васта, касондыхть бюджетть эсь доходонза. Тяда башка, вете кизоста строяф 60 тежянь квадратнай метра эряма васта, 30 вайгяльбень кувалмоса кит. Минь сяда товга карматама шарфнема мяль Ковылкинскяй районть благоустроендаманц лангс, тяконь лувксса и национальнай проекттнень рамкаса».
Мордовия Республикань Оцюнять Указонц мархта республикать социально-экономическяй виияфнеманцты оцю путксонкса В.И.Ташкин казьф Славань III степенень Орденца. Депутатонь Советть решениянц мархта Виктор Ивановиченди максф Ковылкинскяй райононь почетнай гражданинонь лемсь.
Сессиять пингста депутаттне примасть решения мзярошка пингс путомс райононь оцюнять обязанностензон Ковылкинскяй муниципальнай райононь оцюнять васенце заместителенц Николай Комусовонь лангс. Депутаттне стане жа ванозь кизефксть, кона сотф Ковылкинскяй райононь оцюнять должностьс кандидатурань кочкамать коряс конкурсть етафтоманц мархта. Конкурснай комиссиять заседанияц азф 2019 кизонь 2 июльти.