18 апреля 2019 Шавшиста, 16 апрельста, Мордовиянь Оцюнясь Владимир Волков примась участия МР-нь Госсобраниять 34-це сессиянц работаса, конань вятезе Председательсь Владимир Чибиркин. Депутаттне кирдезь 37 законопроектть ширеснон, конатнень ламошкасна сотф велень поселениятнень эса полафткснень мархта. Депутаттне максозь вайгяльснон кой-кона сельсоветтнень фкяс пуроптомаснон инкса. Полафтксне эвондасть сембе 22 райононь башка велеса. Сессиять пингста сувафтфтольхть полафткст Мордовияса межбюджетнай отношениятнень колга законть проектс. Документть коряс, кажнай районца эвондайхть модельнай муниципальнай библиотекат оцю скоростень интернет мархта, а кой-конатнень эса и виртуальнай концертнай залхт, кода Кирюковонь лемса музыкальнай училищаса. «Тядде 30 миллион цалковай нолдави 4 модельнай муниципальнай библиотекань и 5,6 миллион цалковай виртуальнай концертнай залонь панжеманкса», - азозе МР-нь культурань, национальнай политикань и архивнай тевонь министрсь Анатолий Чушкин. Республикань Оцюнясь китькстазе, што Мордовияса работайхть цебярь акустика мархта концертнай залхт, конат мезьсовок аф сяда кальдяфт Москувоннетнень коряс. Республикань парламентарийхне максозь вайгяльснон 2019 кизонди и 2020 и 2021 кизонь плановай пингти региононь медицинскяй страхованиянь Территориальнай фондть бюджетонц колга МР-нь Законти полафткснень инкса. Законть проектоц сотф Россиянь бюджетнай кодексть вешфксонзон коряс тевть ладяманц мархта, лиякс азомс, «Земский доктор» программань участникнень мархта пингта инголе трудовой договорть коламанкса тевс аф нолдаф межбюджетнай трансферттнень мрдафтомасна. Тяда башка, эвондась вешфкс сувафтомс бюджетть доходнай пяльксозонза 6 миллиотт цалковаень лувксса налоговай доходонь поступлениятнень. Фондтть 54 миллион цалковаень лувксса средстванза нолдавихть велеса врачнень и средняй медперсоналть трудснон инкса пандоманкса карьхцнень софинансированиянкса, мезсь лезды машфтомс первичнай звенань специалистонь аф сатнемать. Стане жа депутаттне максозь вайгяльснон «За заслуги в развитии законодательства и парламентаризма» МР-нь Государственнай Собраниять почетнай знаконц кемокстаманкса. Казнесь арай инь цебярь оценкакс законотворческяй тевса граждаттнень личнай участияснон, властть и обществать еткса взаимодействиять кемокснеманцты путксонкса. Казнесь ладяф Мордовиянь Госсобранияти 25 кизонь топодемать мяльс сявондезь. Сессиять пингста киртьфоль Владимирскяй областень Законодательнай Собраниять Россиянь Минсельхозти обращениянц ширец, кона сотфоль работатнень, производстватнень, профессиятнень, должносттнень и специальносттнень лувксснон касфнеманц мархта, конатнень коряс латцеви сирексшис коре стразовой пенсияти и инвалидностть коряс страховой пенсияти фиксированнай выплатать лувксонц касфнемац. Депутаттне кирдезь Наталья Тарасовать ширенц Ичалковскяй райононь судебнай участкань мировой судьянь должностьс кочкаманкса. Стане жа сессиять пингста примафтольхть лия закононь проекттне.
