Мордовиянь Оцюнясь Владимир Волков 14 майста примась участия совещанияса, конань видеоконференцсвязень режимса етафтозе РФ-нь Правительствань вице-премьерсь Виталий Мутко. Совещанияса башка корхтама мольфтевсь уштомань етай пингть колга.
Виталий Мутко отмечазе: ся региоттнень эса, коса губернаторхне шарфнихть тя ширети башка мяль, сезонць етась лац. Но целайнек ЖКХ-нь объекттнень эса чрезвычайнай ситуациятнень лувкссна кассь, и фкя инь васенце туфталсь – сеттнень сирексшисна. Вице-премьерсь отмечазе, што сай кизоста арьсекшневи нолдамс тевс коммунальнай инфраструктурать одкстоптоманц коряс федеральнай программать. Тянкса региоттненди эряви пачфтемс РФ-нь Минстрою информация объекттнень колга, конатнень сирексшисна пачкодсь 60 процентс, а стане жа ся средстватнень колга, конат эрявихть синь петеманксост, штоба объекттне отвечальхть нормативно-техническяй вешфксненди.
Стане жа корхтафоль «Жилье и городская среда» национальнай проектть эряфс етафнеманц рамкаса эряма вастонь строямать колга.
Видеоконференциять шумордамда меле Мордовиянь Оцюнясь етафтсь республиканскяй совещания азф кизефкснень коряс. Уштомань пингсь республикаса етась штатнай режимса, чрезвычайнай ситуацияфтома. Марнек жилой фондсь и социальнай объекттне обеспечендафтольхть лямбоса педа-пес. 2018-2019 кизонь сексень-тялонь пингти анокламанкса жилищно-коммунальнай хозяйствань и энергетикань предприятиятнень мархта нолдаф 1,5 миллиард цалковайда лама.
Владимир Волков путсь задача Мордовия Республикань Жилищно-коммунальнай хозяйствань, энергетикань и населениять гражданскяй араламанц коряс министерствать инголе кочкамс-сермадомс коммунальнай инфраструктурань объекттнень, конатненди эряви модернизация, штоба сувафтомс синь федеральнай программати. Республикань вятись башка китькстазе, што объекттнень лувксс обязательна сувафтомат Рузаевкань водоснабжениянь и водоотведениянь объекттне.
Стане жа Мордовиянь Оцюнясь шарфтсь мяль «Чистая вода» федеральнай проектть лангс, конань рамкаса арьсефт мерат симома ведть качестванц цебярьгофтоманкса, тяконь лувксса республикань райоттнень эса.
«Эняльдян шарфтомс башка мяль тянь ширде лафча райоттнень лангс, тяконь лувксса Торбеевскяй и Ардатовскяй райоттнень лангс, коса ведть мархта сотф кизефксне ащихть пяк оржаста», - мярьгсь Владимир Волков.
Ванфтольхть кизефксне, конат сотфт Мордовияса «Жилье и городская среда» национальнай проектть эряфс етафнеманц мархта. Тядде регионца эряви строямс 338 тежянь квадратнай метра эряма васта, а 2024 кизоть самс объемтне должетт касомс 1,5-крда – 500 тежянь квадратнай метрас. Сяс Владимир Волков путсь задачат строямать алу модань участкатнень анокламаснон коряс.
Мордовия Республикань Оцюнять пресс-службац