Сочиса Российскяй инвестиционнай форумть рамкаса 14 февральста Мордовиянь Оцюнясь Владимир Волков примась участия пленарнай заседанияса, конань эса выступандась Россиянь Правительствать Председателец Дмитрий Медведев.
Премьер-министрсь китькстазе, што тя форумсь эсь лацонне тяда ингольденнетнень коряс. «Васенцеда минь корхтатама странаса сембе ширдень полафткснень колга. Сембось, мезе тейнек эряви тиемс ломаттнень эряфснон цебярьгофнеманкса, странать виияфнеманкса маластонь кота кизотнень, мусь васта национальнай проекттнень эса. Национальнай проекттне – фкя марстонь матрица, коза минь старандаме тялькфтамс марнек странать эряфонц. Азсаськ видеста, Россиять тяниень историянц пингста мезевок тянь лангс шарфты ашезь тиендев», - мярьгсь Дмитрий Медведев.
Премьер-министрсь китькстазе, што российскяй экономикать эса ули нинге аф кржа прябала, ломаттне мзярс эряйхть стакаста и вешихть социальнай справедливость. И национальнай проекттне – ня прябалатнень решандаманкса лисема васта. Тяка пингть Дмитрий Медведев китькстазе,
што нацпроекттне должетт улемс арьсефт эрь регионть вешфксонзон коряс, и ярмакне явовихть тянь мяльса кирдезь.
Премьер-министрсь отмечазе, што форумть работанц рамкаса сон етафты башка васедема губернаторхнень мархта, конань пингста башка мяль шарфтови социальнай сфераса нацпроекттнень лангс, сяс мес синь ломаттненди фкя инь васенцетне.
Форумонь васенце шиня Мордовиянь Оцюнясь Владимир Волков стане жа примась участия «Региональная политика в контексте пространственного развития России» и «Лучшие практики социально-экономического развития. Комплексные решения для регионов» дискуссионнай кафта площадкатнень работаса.
Мордовия Республикань Оцюнять пресс-службац