14 февральста, Сочиса Российскяй инвестиционнай форумть форумть работанц васенце шиня, Мордовиянь Оцюнясь Владимир Волков кемокстась сотрудничендамать колга соглашения «ВЭБ Инновации» ООО-ть мархта Приволжскяй федеральнай округонь технологиянь трансферонь Венчурнай фондть пуроптоманц колга. «ВЭБ Инновации» ООО-ть эзда документть алу кяденц путозе компаниять директороц Олег Теплов.
Соглашениясь кемокстаф Приволжскяй федеральнай округонь технологиянь трансферонь Венчурнай фондть пуроптоманкса, фкя инь васенце инвесторкс конанди лиссть «ВЭБ Инновации» ООО-сь и Мордовия Республикань научно-техническяй сфераса емла предприятиятненди венчурнай инвестициятнень виияфнемаснонды лездомань фондсь. Фондть работац кармай водендаф Мордовиять территорияса, а стане Приволжскяй федеральнай округса, федеральнай и международнай уровеньца высокотехнологичнай проекттнень эряфс етафнеманкса.
Фондть пуроптомаса лезды и нолдави тевс республикань венчурнай фондть опытоц, кона етафтсь эряфс 20 лама проект, тяфтамот кода «Мордовская трубнай компаниясь», «Од композитнай материалхне», «Лидер-Компаунд» ЗАО-сь и ламотне лиятне.
Мордовия Республикань Оцюнясь Владимир Волков отмечазе: «Мекольдень пингть республикань научно-производственнай комплексса эряфс етафтфоль несколька инновационнай проект. Соглашениясь арась полатксокс Мордовия Республикань венчурнай фондть работанцты, а стане жа региононь инновациянь марнек системати».
«Мордовия Республикать мархта соглашениясь – тя Россияса высокотехнологичнай проекттнень кирнемаснон коряс инфраструктурать виияфнеманкса водендаф программать пяльксоц. Марса республикать мархта пуроптови фондть объемоц васенце этапса кармай 500 миллион цалковай. Тяфтама решениятне максыхть возможность пуроптомс РФ-нь федеральнай окрукнень эса фондонь единай система. Кеман, марстонь вийса тейнек удалай етафтомс российскяй стартапнень качественнай од уровеньц», - мярьгсь «ВЭБ Инновации» ООО-ть генеральнай директороц Олег Теплов.
Пуроптови Фондть инвестиционнай возможностенза – Smart City (“Еню ошт») технологиятне и лия инновационнай технологическяй проекттне, конатнень ули экспортнай потенциалсна, конат лезнихть региоттнень эса инновационнай тефнень виияфнемаса, лангозост инновационнай мялень шарфнемать касфнемаса.
Соглашениять кемокстамда инголе Мордовиянь Оцюнясь етафтсь переговорхт, конатнень эса примась участия РФ-нь ВЭБ-ть председателенц заместителец Вячесла Шуленин. Корхтафоль республикать экономиканцты эрявикс проекттнень эряфс етафнемаса лезксонь максомать колга, тяконь лувксса оптическяй волокнать производстванц коряс, Саранскяйса «Оптиковолоконные системы» заводть омбоце очереденц строяманц коряс.
Мордовия Республикань Оцюнять пресс-службац