Мордовиянь Оцюнясь Владимир Волков 3 октябрьста етафтсь рабочай васедема венгерскяй инвесторхнень мархта. Корхтафоль кафта кизода инголе Мордовиянь Правительствать и Венгриянь Внешняй экономическяй связень и омба масторонь тевонь министерствать еткса кемокстаф АПК-са марстонь работань вятемать колга соглашениять рамкаса республикань Теньгушевскяй районца 2400 пря потяви траксонди молочнай комплексть строяманц коряс проектть эряфс етафнеманц колга.
Региононь вятити пачфтьфоль инвестпроектть эряфс етафнеманц коряс етафтфт мероприятиятнень колга, тяконь лувксса молочнай комплексть алу модань участкать максоманц квалма. Шарфтфоль мяль участкать эрявикс инженеранй и транспортнай инфраструктураса козякофтоманцты. Мордовиянь Оцюнясь Владимир Волков китькстазе, што проектсь пяк эрявикс республикати и эряви сяда товга макссемс инвесторхненди сембе ширдень лезкс, тяконь лувксса АПК-нь виияфнемань государственнай программать рамкаса. Тянь коряс порученият максфтольхть республикань Минэкономонь и Минсельхозонь вятихненди. Арьсекшневи, што молочнай комплекссь строяви 2020 кизоть ушедомс, предприятияса панжеви 100 од рабочай васта.
Венгерскяй представительхне отмечазь исполнительнай властень оргаттнень цебярь работаснон, тяконь лувксса районнайхнень, проектть эряфс етафнемста эвондакшни кизефксснень курокста решандакшнемаснон коряс. Проектть вятиец азсь кемама, што Мордовиять мархта сотрудничендамась канды цебярь кафцьке ширетненди, ули надияма, што маластонь пингть лангозонза шарфтыхть мяль Венгрияста нинге несколька агроинвесторсь.
Рабочай васедемаса примасть участия МР-нь Правительствать Председателенц васенце заместителенза – экономикань, торговлянь и предпринимательствань министрсь Владимир Мазов и велень хозяйствань и продовольствиянь министрсь Владимир Сидоров.
Мордовия Республикань Оцюнять пресс-службац