Победань шиня Мордовиянь Оцюнять аф лама пингс тевонзон тиендисна Артём Здунов телефононь пачк спасибась Великай Отечественнай войнань ветераттненди оцю подвигонкса, конань вельде мирсь аралавсь фашисттнень эзда. Поздравляеният получасть Петр Фомич Кучаев Ардатоваста, Михаил Семенович Романов Лямбирскяй райононь Александровка велеста, Виктор Николаевич Куликов Саранскяйста, Константин Алексеевич Винокуров Ичалковскяй райононь Смольный поселкаста и Михаил Семенович Борискин Саранск ошень округонь Горяйновка велеста.
«Седи ваксста поздравляндатядязь тинь и сембонь, кие тячи мархтонт праздновандасы Победань шить, - мярьгсь Артём Алексеевич Михаил Семенович Борискинонь мархта телефононь пачк корхтамста. – Кемодонга кеме шумбраши тейть, минь марятама гордость, што республикасонк улихть тяфтама геройхть, Сембе цебярть тейть! Монь пара мялезон, мес минь мархтот нинге земляктама».
«Да, шачемас-касомас коре мон Атяшевскяй райононь Киржеманы велеста, - азозе Михаил Семенович. – Тяни тоса лядсть аньцек ниле ветератт, эздонк тячи лядонды пяк кржа. Сюкпря тейть поздравляндаманкса!»
Республикань вятить мархта корхнемста ветеранць азондсь эсь трудовой и военнай кинц колга. Мзярда ушедсь войнась, сон 14 кизоса подросткакс работась колхозса, коса ашесть сатне рабочай кяттне. 1944 кизоня тертьфоль фронту. Учебнай частть шумордамда меле повсь связень войскатненди. Тюрсь Западнай фронтса – Венгрияса, коса обеспечендакшнесь бесперебойнай связь советскяй Правительствать и европейскяй государствань вятихнень еткса. Куду, Мордовияв, мрдась 1951 кизоня сержантокс. Войнада меле лемдзе эряфонц велень хозяйстваса работамати, мезенкса теенза максф «Велень хозяйствань Заслуженнай работник» почетнай званиясь. Михаил Семеновичень 4 иденза, 7 уноконза и идень 3 уноконза.
Петр Фомич Кучаев тертьфоль службас 1944 кизоня, служась Дальняй Востокса 1947 кизоть самс, сяльде Германияса. Ардатовскяй райононь Чукалы велеса шачф-касф алясь войнада мельдень эряфонц лемдезе емла родинанцты, велень хозяйствати. Сон Ардатовскяй райононь почетнай гражданин, казьф лама казнеса.
Михаил Семенович Романов тертьфоль службас 1943 кизоня, воявась пулеметно-артиллерийскяй батальонца, войнада меле работась колхозса. Касфтсь 8 итть, сонь 10 уноконза и идень 12 уноконза.
Виктор Николаевич Куликов 1943 кизоня тертьфоль фронту Дальняй востоку, примась участие Маньчжуриять воляс нолдамаса. Войнада меле 7 кизот служась Сахалинца. Родиназонза мрдамда меле трудендась токарькс Саранскяень экскаваторнай заводса, 44 киза ащесь станокть маласа. Сонь кафта иденза, 2 уноконза, идень 2 уноконза.
Константин Алексеевич Винокуров тертьфоль армияв 1942 кизоня, 16 кизоса. Служась артиллерийскяй полкса. 1945 кизонь февральста Гданьскяйса крепостть и аэродромть сявомста стакаста ранендафоль пильгс, сонь савсь керомс. Госпитальса сон и васьфтезе Сяськомать. Константин Алексеевичень 4 иденза, 9 уноконза, идень 17 унокоц и уноконь 4 уноконза.
Сюконятама теенть карксэземга, кельгома ветератт!
Сюкпря Сяськоманкса!
Мордовия Республикань Оцюнять пресс-службац