Мордовиянь Оцюнясь Владимир Волков етафтсь рабочай васедема «Ковылкинский электромеханический завод» ПАО-ть генеральнай директоронц Владимир Евтеевонь мархта. Корхтамась мольфтевсь 2018 кизоня предприятиять работанц, а стане жа тядденди платтнень колга.
Владимир Евтеев азондсь региононь вятити, што меля Ковылкинскяй электромеханическяй заводти удалась пяшкодемс плановай показательхнень – продукциянь производствань объемтнень, отгрузкатнень коряс. Получаф пцтай 274 миллион цалковай прибыль. Ковти средняй заработнай платась предприятияса ульсь 36 тежянь цалковай. «Ванфневи предприятиянь работникнень лувкссна, удалси получсемс од закаст», - азозе Владимир Евтеев.
Меля Ковылкинскяй электромеханическяй заводса етась «Росэлектроникань» оцю выставка, коса участия примасть холдингонь 35 предприятиясь. Ванфты производствань принципне тонафневсть именна Ковылкинскяй электромеханическяй заводса аф стак. «КЭМЗ»-сь ушедсь сувафнема тевс ванфты производствань принципнень 2014 кизоста сявомок, экономическяй эффектсь тянь эзда колма кизоста арась 14 миллион цалковайда лама. Республикань Оцюнясь отмечазе предприятиять опытонц оцю значениянц. «Васендакиге ванфты производствань правилатне кадондсазь эсь пильгокиснон рядовой работникнень трудендамань условиясост – лезнихть касфнемс производительностть и касфтомс производствать культуранц, тиендихть трудендамань безопаснай условият. Сембось, мезсь сотф рабочай вастса ломанть прянь маряманц мархта – веши башка мялень шарфтома!» - китькстазе республикань Оцюнясь.
Мордовия Республикань Оцюнять пресс-службац