Лятфтасаськ, што тяни республикаса эряй 2 400 лама шаба-инвалид. Эздост ламоцнень ули оцю потенциалсна аф аньцек физическяй культуранди, но и эряз эряфонь вятеманди – культурать и спортть пачк касоманди-виияманди. 2022 кизоста Мордовиясь примси участия благотворительнай проектса – республикаса кочкаф вете командат ниле адаптивнай спортонь видттнень коряс. Анокламатне мольфтевихть Саранскяйса, Краснослободскяйса и Инсараса.
«Пара мялезон няемс, кода виензакшни адаптивнай спортсь республикаса –2021 кизоня минь кочкаськ васенце следж-хоккейнай командать, коза сувась 11 идь. Кафта киза ётазь минь уже вете команданеке, основаннайхть хоккейть и баскетболть лангса. Синь эсост мусть васта 70 идьтта лама - азондозе «Больше чем спорт» АНО-ть исполнительнай директороц Наталья Шмонина. – Минь няйсаськ, што Мордовияса минь распоряжениясонок улихть сембе ресурсне и надежнай партнерхт, конат анокт покодемс тя направлениять лангса».
Организациять прявкс задачанзон эзда фкясь, - сувафтомс кода можна сяда лама идь шумбрашинь эсь лацонь ширетнень мархта спортти. Сянкса инжихнень ульсь предложениясна – тиемс Мордовиянь эрь семьяти адаптивнай спортонь видтть коряс варжамань тренировка.
Артём Здунов кирдезе тя инициативать, мярьгсь, што республикать эзда кармай максф сембеширдень кирдема.
АНО «Больше чем спорт» АНО-ть программнай отделонц руководителец Ирина Тарасова азондозе, што Мордовияса тиф акцент спортса сатфкснень лангс, а АНО-ть мархта регионтть марспокодемань пара опытть колга азонкшневи эрь кодама площадка лангса. «Тяфтама результатт Мордовияса афольхть заняв властть, бизнесть и афкоммерческяй организациять мархта марстонь вийфтома», - китькстазе сон.
Корхтамать пингста ульсь азф инголи, што 14-15 июльста Саранскяень «Огарев Аренаса» ётай «Прорыв» регионъётконь турнир адаптивнай хоккейть коряс, конань эса приммайхть участия 200 лама спортсмен.
Мордовия Республикань Оцюнясь Артем Здунов