Форумсь – тя марстонь корхтамати пяк цебярь площадка таза обществань касфтомать кемокстамаса. Тяса ульсь мольтф корхтама тяниень пингонь шумбрашинь ванфты технологиятнень колга, профилактическяй медицинать касфтомац и виияфтомац, а тяфта жа шумбрашить сяда лац вятеманц эса. Башка мяль шарфтф Российскяй граждаттнень эряфнь киснон кувалгофтоманц лангс семьяста ушедомать эзда, отечественнай медицинать и фармацевтическяй медицинать промышленностенц касфтовомаса.
Тя шиня форуму аноклаф выставкать ванозе Россиянь Правительствань Председательть полафтыец Татьяна Голикова. Тяка ширеть азсаськ, што сон ульсь и Мордовия Республикать стендонц ваксса. Региононьке Россиянь президенть мяленц вельде эрязста касфты органическяй продукциять и сувси ТОП-10 сертифицированнай субъекттнень лувксснон. Вице-премьерти азондсть органическяй продукциять колга, кона нолдави республикаса. Тяка пингть, Шабань пищевой станциять гендиректороц Сергей Киреев шарфтсь мяль, што 20 кизода лама предприятиясь нолдай шабатненди лофцонь ярхцамбяль, ули башка линейка органическяй ярхцамань нолдамаса инь ёмла шабатненди – тя фкятнень ёткста фкя тяфтама производства марнек Россияса. Стендса тяфта жа ульсь няфтьф сельхозпредприятиятнень продукциясна «Мордовские пенькозаводы», «Край земли», «Правильные продукты» и «Биосфера». Мекольцесь «Аривера» торговай марка ала нолдай 40 лем ала Россияса васенце бакалейнай ярхцамань линейкаса, конат стандарттнень коря сертифицированнайхть органическяй мода лангса.
Пленарнай сессияса вице-премьерсь пачфтезе Президентоньконь шумбракстома валонц, кона арьсеф форумонь участникненди: «Тематне, конат азфт форумть повесткаса, кандыхть прянь апак шнак, общенациональнай смузь. Корхтамась моли демографическяй касомать кеме сотксонзон ванфтомаснон эса. Ломаттнень шумбрашиснон ванфтомать и кемокстамать колга, эряфть цебярьгофтоманц и кувалгофтоманц колга».
Эсь корхтамасонза Татьяна Голикова шарфтсь мяль, што федеральнай проектть рамкаса «Здоровье для каждого» нацпроектть ушедомаса «Продолжительная и активная жизнь» масторсонк ушедсь инголе арьсеф шумбрашинь центратнень и медицинскяй кабинеттнень эса оцю и крхка полафтовома. Тяфтама центрат эрявихть арьсемс регионга. Синь покодема тевсна ули шарфтф мумс шумбрашинь колай афсатыкснень лангс – предрискнень и ваномс синь сотксснон сиредемать мархта. Центратне арайхть инь эряви вятикс превентивнай медицинаса. Сон тяфта жа азсь мяль Минздравти ваномс одс должность – кувака эряфонь шумбрашинь ванфты медицинань врач.
Оцю васта максови эряйхнень шумбрашиснон ванфтомаса покодемать перьф сотф пингти – тянкса эряви арьсемс мероприятиянь кочкафкст предприятияса, организацияса, покодема коллектифнень эса.
Тяфта жа вице-премьерсь инь эрявиксокс кувака эряфонь шумбрашить ванфтомаса шарфтозе мяленц семьять вастонц лангс: «Минь сембонь ули семьяньке. А нинге ули сяда цебярь – оцю и лама шаба мархта!»
Татьяна Голикова сессиять пингста шарфтсь мяль, што ванозе Мордовия Республикать стендонц, няезень республиканскяй производительхнень шумбрашинь ванфты ярхцаматнень аноклафснон. «Минь ульсь пяк лад мялезонк. Тинь шарфттада оцю мяль тянь лангс, - пшкядсь сон Мордовия Республикать Оцюнянцты. – Содаса тинь пяк цебярь проектонтень шумбрашинь ванфты ярхцамать школаса нолдаманц колга. Мезе можна азомс тя темать коряс?»
Мордовия Республикань Оцюнясь мярьгсь: шумбрашинь ванфты и культурань юрхне ярхцамать коряс путовихть шабакс пингста сявомок. Фкя тяфтама площадкакс, коса вановихть ня кизефксне можна путомс общероссийскяй школьнай проектсь «Разговоры о важном». «Разговоры о важном» - тя корхтамась аф аньцек политикать, но и сянь колга. кода минь карматама эряма. Кода карматама шабань касфтома. – мярьгсь республикань руководительсь. – Сяс идеологическяй машинась эряви шарфтомс сянь лангс, штоба азондомс ломаттненди: эрямс эряви ламос, сяс мест я эряви тонь семьяцти – шачфтыхненди, шабатненди, и тон тянкса кирдят оцю мяль, башка мяль алятнень колга».
Артём Здунов шарфтсь мяль, што покодема группась школаса андомась Госсоветонь комиссиянц коряс мольфтсы эсь тевонц, сонь лувкссонза социологическяй исследованиятнень лувкссна, конат лездыхть мумс од вешфкст школаса шабатнень андомаснон коряс.
«Мордовиясь – органическяй ярхцамать инкса! Минь ширесонк сон ули и школьнай андомаса», - азозе Республикань Оцюнясь.
Пленарнай сессиять шумордаманц песта ульсь ётафтф каземань ила. Татьяна Голикова казьсь Мордовия республикань Оцюняти Российскяй Федерациянь Правительствань Председателенц Сюконяма валонц эявикс аськолксонь путоманкса демографиять кемокстамаса и шумбрашить ванфтомаса.
Мордовия Республикань Оцюнять Пресс-службац