«Петербургская политика» фондть апрельскяй исследованиясонза Мордовиясь занязе 5 вастть инь оцю социально-политическяй кемоши мархта региоттнень группасост.
Главнай событиякс, кона лездсь сатомс тяфтама результат, арась Россиянь Президентть Владимир Путинонь решенияц путомс Владимир Волковонь республикань Оцюнять тевонзон тиендикс сентябрьста кочкаматнень самс. Кремляса васедемать пингста Президентсь азсь надияма, што Владимир Волков лац етафтсы кочкамань кампаниять и поладсы работать.
Нинге фкя няевикс событиякс арась республикань лидерть Израильста инвесторхнень мархта, конат арьсекшнихть ладямс Мордовиять мархта агропромышленнай производстваса сотрудничества, васедемац. Владимир Волковонь валонзон коряс, сотрудничествась лезды республикань аграрнай комплексть кемокснеманцты.
«Велень хозяйствась – тя республикань экономикать вииякшни и ламонь надияфни отрасляц, фкя инь цебярсь Россияса. Валовай региональнай продуктаса АПК-ть пяльксоц пачкотькшни 13,5 процентс, мезсь 2,5-крда сяда оцю странаса средняй показательхнень коряс. Мордовиясь фалу занцесыне васенце васттнень ПФО-нь и Российскяй Федерациянь региоттнень еткса фкя эряйть лангс велень хозяйствань продукциять производстванц коряс.
Тячи продукцияньконь 60 процентта ламоц мишендеви ширеса республикать эзда. Тя Мордовиянь аграрийхнень странать продовольственнай безопасностенцты и продукциянь рынкаса импортть полафнеманцты оцю путкссна. Минь путнетяма аф емла задачат АПК-са производствань объемтнень сяда товолдонь касфнемаснон коряс», - отмечазе Мордовиянь Оцюнять тевонзон тиендисна .
Рейтингонь васенце колма строчкатнень занцесазь Белгородскяй областсь, Ямало-Ненецкяй и Чукотскяй автономнай окрукне.