«Петербургская политика» фондсь аноклазе российскяй региоттнень кемошиснон коряс эрь ковонь рейтингть. Сентябрь ковонь итокнень коряс Мордовиясь занязе 5 вастть социально-политическяй инь оцю показатель мархта территориятнень группаса.
Организациянь аналитикне традицияс коре азозь событиятнень, конат сявовсть мяльс республикати оцю вастонь максомста. Етай ковонь васенце событиясь сотф Саранскяйса оптическяй волокнать производстванц коряс странаса васенце заводть работанц мархта.
Мордовиянь Оцюнясь Владимир Волков, улемок предприятияса, азондсь оптическяй волокнань производствать и оптоэлектроникать колга. Тяда башка, Мордовиянь вятити казезь колма километрань кувалмоса оптическяй волокна мархта юбилейнай катушкать.
Кода китькстазе Владимир Волков, заводсь коль касфнесыне производствань объемтнень. Тяфта, волокнань васенце миллион километрать заводсь нолдазе 1, кизоста, омбоцеть – фкя кизоста, колмоцеть нолдамонкса эрявкстсь пяле киза. Сай кизоть пенцты арьсекшневи ушедомс нолнема 1 миллион километра оптическяй волокна кварталти. Тяддень кафкса ковонь итокнень коряс оптическяй волокнать тевс нолнемац Россияса кассь уликсть колмоцекс пяльксонц.
Заводть руководстванц инголе путф оцю задачат: нюрьхкяня пингста шумордамс модернизациянь программать и сай кизоть кярьмодемс омбоце пусковой комплексть строяманцты.
Няевикс событиятнень еткс стане жа повсь МР-нь Правительствать Председателенц Владимир Сушковонь «Возрождение» банкть руководстванц мархта васедемац, конань пингста корхтафоль строительстваса и ЖКХ-са инвестиционнай проекттнень эряфс етафнемаснон колга, а стане жа МР-нь Государственнай Собраниять пенсиянь карша кизоса лицатненди региональнай льготатнень ванфтомаснон коряс решенияц.