28-29 июньцта Мордовия Республикаса етай сокамать коряс Россиянь Панжада 8-це чемпионатсь. Тяфтама договоренность сатфоль «Золотая осень-2018» Российскяй агропромышленнай выставкать площадкаса, коса вете региоттнень еткса, конат участвондасть тя мероприятиять етафтоманкса конкурсса, «Росагролизинг» АО-ть руководстванц мархта кочкафоль Мордовиясь. Тя оцю событиясь кармай «1 мая» ФГУП-ть территорияса, Саранск ошень округонь Горяйновка велесь.
Мордовиять чемпионатса няфтьсазь «Агрофирма «Кировская» ООО-нь механизаторсь Алексей Киреев и «Развитие села» АО-нь техникать ремонтонц коряс участкать начальникоц Сергей Митрофанов.
Сокамать коряс Россиянь чемпионатсь – отечественнай и омба масторонь компаниятненди, конат нолнихть велень хозяйствань продукция, выставочнай и демонстрационнай площадка. Турнирсь кармай панжада, а тя корхтай сянь колга, што модать обработканц коряс мастерствань пялькстомаса примайхть участия омба масторонь государствань представительхне.
Сокамань Всемирнай организациять мархта примаф решения, што 2020 кизоня мировой первенствась етай Россияса. Тянкса Мордовияса сокамать коряс Россиянь Панжада 8-це чемпионатсь – тя эсь лацонь аноклама, минь возможностеньке няфтемасна, што Россиясь анок примамс сокамать коряс миронь чемпионатть.
Чемпионатть программаса – «оборотнай» сокамаса и «Трактор-шоуса» механизаторхнень пялькстомасна, коса участникне няфтьсазь мастерстваснон «кшнинь алашать» вятемаса. Сокамань Всемирнай организациять правиланзон коряс кажнай механизаторсь получай сокамань участка, кона сокама 3 частста. Судьятне сявсазь мяльс сокакить крхкалмонц, сонь видешинц – сембоц кармай оценкань максомань 14 параметра.
Трактор-шоусь – тя тракторть вятеманц коряс мастерствань пялькстома, конань пингста участникненди эряви ардомс трассава сталма мархта азф пингста.
Чемпионатть деловой программас сувайхть велень хозяйствань производительхнень, машиностроительхнень, а стане жа профильнай министерствань представительхнень совещаниясна и дискуссиясна. Етафтови Россиянь крестьянскяй (фермерскяй) хозяйствань и кооперативонь Ассоциациять (АККОР) совещанияц, аграрнай секторса од ломанень политикать и кадровай потенциалть виияфнемаснон коряс совещания. Омба
масторонь сокайхне няфтихть мастер-класс и етафтыхть семинархт. Машиностроительнай компаниятне няфтьсазь велень хозяйствань техникань, животноводческяй и перерабатывающай оборудованиянь мекольце разработкаснон.
Сокамать коряс пялькстоматнень кунардонне историясна. Сембось ушедсь Ирландиянь кафта графстватнень еткса конкурсть эзда. Тяни тя важнай пялькстомат, конат пуропнесазь инь цебярь сокайхнень марнек мирста-масторста.
Сокамать коряс васенце пялькстоматне етасть 1931 кизонь 16 февральста Ирландияса Уэксфорд и Килдэр графстватнень еткса. Омбоце кизоня примафоль решения етафтомс тяфтама жа соревнованият странань сембе графстватнень еткса. Тянкса 1931 кизоть песта Ирландияса пуроптфоль Сокамань национальнай Ассоциация (NPA). 1954 кизоня, миронь омбоце чемпионатть рамкаса Ирландияса етась аватнень еткса сокамать коряс васенце чемпионатсь. Эсонза ульсь кода примамс участия сембе аватненди. Сяськись получсезе «Сокань королева» титулть.
СССР-са етафневсть механизаторхнень еткса эсь пялькстомат. Конкурсонь васенце финалсь етась Москуть ала 1967 кизоня и лемтьфоль Октябрьскяй революциять 50 кизонь топодеманцты. Кизода меле всесоюзнай конкурсть финалоц ульсь Эстонияса, 1969 кизоня – Тульскяй областной велень хозяйствань опытнай станцияса.
2008 кизоня Россиясь сувась Сокамань Всемирнай движениять лувксс.
Российскяй васенце чемпионатсь етась «Росагролизинг» АО-ть инициативанц коряс 2012 кизоня Краснодарскяй крайса и пуроптозень марс инь цебярь механизаторхнень 23 регионцта. Сокамань Всемирнай организациять президентоц Тугомир Майдак выступандась судьякс Россиянь васенце панжада чемпионатса, максомок оцю оценка пялькстоматнень анокламаснонды.
Россиянь чемпионатсь няфтезе эсь прянц кода достойнай площадка, коса сокайхне и аграрнай отраслянь лия специалисттне полафнихть опытса и содамошиса. Именна тяфтама профильнай мероприятиятне макссихть возможность полафтомс сельмованфть велень хозяйствань профессиятнень лангс. Чемпионатсь пуропнесыне велень од и заслуженнай труженикнень.
Сокамать коряс чемпионатть, кода общественно-значимай мероприятиянь етафтомац, лезды решандамс Россиянь агропромышленнай комплексть инголе ащи фкя инь оржа кизефкснень, тяконь лувксса:
- касфнесы велень хозяйствань трудть престиженц;
- касфнесы Российскяй Федерацияса велень хозяйствать вятеманц коряс культурать;
- лезни полафнемс опытса и сувафнемс велень хозяйствань производствати тяниень пингонь инновационнай технологиятнень;
- водендакшнесыне велень хозяйствань отрасляти од ломаттнень;
- тиендьсы содафокс отечественнай велень хозяйствань производительхнень и велень хозяйствань машиностроительхнень продукцияснон;
- виияфнесы велень хозяйствань инфраструктурать;
- касфнесы механизаторхнень профессиональнай мастерстваснон.
Сокамать коряс Россиянь тяда ингольдень сисем чемпионаттнень итокснон коряс (2012-2018 кизотнень) ули кода корхтамс сянь колга, што странаса сокамань движениясь ушедсь виияфневома. Касонды чемпионатонь участникнень лувкссна, кода отечественнайхнень, стане и омба мастороннетнень. Ся, што пялькстомати ули оцю интерес омба масторонь командатнень ширде, корхтай мероприятиять анокламанц оцю уровененц колга.
Тернесаськ Мордовиянь эряйхнень и инжихнень кирдемс чемпионатонь участникнень ширеснон, самок тя оцю мероприятияс 28-29 июньцта. Казеда эстеенть афкуксонь праздник Россиянь тяниень пингонь агропромышленнай комплексть инкса гордостень марязь!