Од составти сувась 51 общественнай деятель, 19 конатнень эзда – одукс кочкафт.
Регионть руководителец сюконясь ингольдень составти покодеманкса и китькстазе, што сонь покодемац ётнесь стака, исторически важнай пингста.
«Общественнай палатась – минь обществасонок эряви институт. Сонь основной задачац – властень оргаттнень и рядовой гражданиттнень ёткса диалогсь. Мон арьсян, што тя задачась пяшкотькшневи, - мярьгсь Артём Здунов. - Содаса, што од составсь кармай тиендема тянь эса сяда тов тевонь содазь».
Эрявикс ширетнень ёткс Республикань Оцюнясь путозень од ломанень, религиознай, ветеранскяй организациятнень мархта покодемать, идькс пингонь, культурань и историянь кизефкснень. Прявкс тематнень эзда фкясь – СВО-нь участникнень и синь семьяснон реабилитациясна и адаптациясна.
Сембе китькстаф ширетнень коряс общественна-культурнай инициативань тостяфнемась пяк эряви. Артём Здунов китькстазе, што мекольце колма кизотнень республикав сувафтовсь пялемиллиард цалковайда лама федеральнай ярмак нят цельхнень лангс, покоди проектнай офизсь грантовай пялькстоманди завкань анокламать коряс. Общественнай палатати сави эрязста тя тевть мольфтемс сяда тов.
«Кеман, сисемце составть эзда кафксосеци ётамась кармай аф маряви. Арьсян сатфкст, тясть валхне эрязшинттень, а ётксонок – властть и общественникнень – границат аш и вестенге аф кармайхть!» - китькстазе Мордовиянь Оцюнясь.
Китькстасаськ, што ётай кизоть МР-нь Общественнай палатати ульсь максф законодательнай инициативань права. Мордовиянь Госсобраниянь Председательсь Владимир Чибиркин лятфтазе, што республикаса уже примаф фкя закон общественникнень инициативаснон коряс, и арьсесь цебярь покодема тя сферать эса Мордовиянь эряйхнень пара эряфснон каршес.
Россиянь Общественнай палатав сувайсь, РФ-нь субъекттнень общественнай приметнемань комиссиянь координационнай советть председателец Александр Воронцов китькстазе: Мордовиясь – сят региоттнень эзда фкясь, коса руководствась пяк сувафтф общественнай деятельностти. «Инголе лама великай тев! Аньцек инголи, аньцек марс минь марстонь сяськоманеконди!» - мярьгсь сон.
Общественнай палатать заседанияса марстонь голосованиять пингста ульсь пяшкотьф мзярошка организационнай кизефкс. Председателькс ульсь кочкаф ОНФ-ть региональнай штабонц сопредседателенц, «Известия Мордовии» газетать прявкс редакторонц Олег Каштанов. «Сюконян верондаманкса. Карматама пяшкотькшнемост сембе путф инголенк задачатнень властень оргаттнень мархта марс», - китькстазе сон. МР-нь Общественнай палатань председательти полафтыкс ульсь кочкаф Российскяй военно-историческяй обществать региональнай отделениянц председателец, МР-нь правительствать видеса гуманитарнай наукань НИИ-ть директороц Галина Куршева.
Иласа тяфта жа ульсть максфт общественнай деятельхненди наградат республикать социальна-экономическяй виензаманцты и гражданскяй обществать касоманцты - виияманцты оцю путфкснон инкса. Тяфта, «За заслуги перед обществом» медальса ульсь казьф МР-нь Общественнай палатань ингольдень председательсь Иван Капитонов.
Мордовия Республикань Оцюнять пресс-службац