Владимир Бакулев азондозе, што Шамиль Тарпищевонь лемса олимпийскяй резервонь спортонь школать панжада кортонзон эса тяни ётнихть «Олимпийские надежды России» теннисть коряс сембероссиянь пялькстомат. Синь эсост примсихть участия странань инь цебярь ёмла теннисисттне 13 кизоти молемс – тя, синь ётксост, и эсь кизонь категориясост Россиянь сборнайти сувайхне. Наградатнень инкса мольфтихть борьба 32 странань ошста представитель. Пялькстоматне молихть 7 июльти.
Тяфта жа корхтамась мольсь сянь колга, што Россиянь теннисонь Федерациять кирдеманц вельде тя кизоть кармай ламода одкстоптф школать инфраструктурац – улемань пингонц потмоста корттнень покрытиясна арась аф пчкяйкс.
Никита Ларьков азондозе, што 5 июльста ушеды кизонь тенниснай площадкань петемась. Сяка пингть кармай мольфтевома покодема школать основной зданиянц кровлянц эса, сонь шумордамдонза меле одкстоптфтсазь и вельхтяф корттнень.
Ульсь китькстаф, што тя кизоть Мордовияса путф планц нинге мзярошка оцю теннистай пялькстомань ётафтома.
Мордовия Республикань Оцюнять пресс-службац