Май ковть песта сонь питнец ульсь 3 302,1 цалковай – тя странаса колмоце результатсь. Тяфтама даннайхть макссевихть Росстатть информационнай сообщениясонза.
Инь емла питнетне Белгородскяй областьса, коса продуктовай корзинать питнец – 3.194 тежянь цалковай, а стане жа Саратовскяй областьса – 3.294 цалковай. Россияса ярхцамбялень наборть инкса рамайти средняйста сави карьхцямс 4036,7 цалковай.
«Кирдемс питнетнень касомаснон лезнихть республикань агропромышленнай комплексть вииякшнемац и продовольственнай ярмаркатне. Синь сидеста етафневихть Саранскяйса и муниципальнай райоттнень эса. Ломаттнень мяльс тушендыхть тяса ладяф питнетне. Мишендемань сеттне стане жа сявондсазь мяльс ня питнетнень. Минь сяда товга карматама виияфнемонза тя ширеть и тиендемонза семботь, штоба ярхцамбяльхне Мордовияса улельхть фкя инь уцезкс странаса», - азозе Мордовиянь Оцюнять аф лама пингс тевонзон тиендисна Владимир Волков.
Инь питни продуктовай карзина мархта вете региоттнень еткс сувасть Чукоткась, Магаданскяй областсь, Якутиясь, Камчаткась и Сахалинсь. Дальневосточнай ня территориятнень эряйснонды продуктовай корзинать инкса сашендови паннемс кафтонь-крда или колмон-крда сяда лама исследованиянь лидерхнень коряс.