Регионттть руководителец китькстазе: мекольце кизотнень медицинати самвсь ётамс од испытания пакч. Но сюконямок медработникнень профессионализмаснонды, профессияти кельгомаснонды и эсь прянь аф ужяльдемаснонды республикань здравоохранениянь системась семботь лац пяшкотькшнесы.
«Тинь профессиянтень мархта ломаттне, аф содасазь кода лиси синь эряфсна, коса эрявксты лезкссна. Кепотьксонди, тяни очередной минь группанеке 39 ломаньста покоди Херсонскяй областьса, инь стака условияса. Коста-коста эсь эряфснонды угроза мархта. Но мзярда медицинскяй работниксь максси клятва, он содасы, што любой пингть может получамс задания, кона эряви тиемс. Мода ваксс прянь нолдама тинь тевти эсь прянь макссоманнтень инкса!» - мярьгсь Артём Здунов.
Мордовиянь Оцюнясь китькстазе: ломаттне районса довольнайхть сянь мархта, кода работайхть фельдшерско-акушерскяй пункттне – аньцек мекольце колма кизотнень республикаса сюконямок нацпроекттненди панчфт колма амбулаторият и 74 ФАПт. Ламоц задачатнень покодихненди сашендови пяшкотькшнемс вастса, тяйне специалистфтома. Сянкса Артём Здунов китькстазе: первичнай лекссь должен арамс республикаса ломаттненди сяда малакс – врачне кармайхть сашендома районнай ФАП-ненди.
Странань Президентть мархта ульсь путф эрямань кувалмонь показательсь 2030 кизоти – 78 киза. Мордовияса уже тяни сон пцтай 74 киза – тя омбоце результатсь ПФО-са. «Оцю труд – пяшкодемс Президентть установканц, но минь тянди мольхтяма. И эрявикс направлениясь тяса – шумбраста эрямась-ащемась. Тинь позициянтте и кепотьксонтте тя кизефксть эса пяк эрявикст, въдь общественность тинь кулхцонттядязь», - мярьгсь республикань Оцюнясь.
Ульсь тяфта жа китькстаф, што ключевой направлениятне тяни и маластонь перспективати – тя СВО-нь участникнень пчкафтомасна и синь семьяснонды лездомась, здравоохранениянь инфраструктурань виензафтомась, отрасляти од специалистонь тердемась.
Мордовиянь Оцюнясь макссь оцю наградат. Лука Крымскяень медаленц мархта ульсь казьф Вера Павелкина – Н.П. Огаревонь лемса МГУ-ть дерматовенерологиянь, фтизиатриянь, инфекционнай болезнянь эпидимологиянь курс мархта кафедрань заведующайсь. Сон путсь оцю путфкс медикнень тевс ковидонь пингть, а 2020 кизоня арась «Кизонь Профессоркс» естественно-научнай направлениять коряс.
РМ – нь Оцюнять Благодарностенза ульсть максфт выездной бригадань медикненди, конат покодсть Херсонскяй областьса: № 4 идень поликлиникать № 1 педиатрическяй отделениять заведующаецты Анастасия Ермушеванди и Рузаевскяй ЦРБ-нь отделениянь экстреннай хирургическяй лезксонь врачти-хирургти Альмир Майдановонди.
Покодемань династиянь кизоть, ульсть китькстафт семьятне, конат мзярошка поколения покодихть тя тевти. Миллер династиять покодемань стажец – 170 киза, Аникиттень династияснон – 124 киза.
Тяфта жа ульсть китькстафт здравоохранениянь ветераттне – панчфт республикань Оцюнять эзда ульсть казьфт анцек ушеткшни медикненди.
Медработникнень тяфта жа илафтозень Мордовиянь Госсобраниянь Председательсь Владимир Чибиркин. «Тинь профессиянтте – Шкайть эзда профессия», - китькстазе сон.
РМ-нь шумбрашинь ванфтомань Министрсь Олег Маркин сюконясь регионтть Оцюнянцты медицинань прябалатнень лангс ваномать и сембе ширдень лезксть инкса. «Кельгома коллегат, седи ваксста сюконян теентть покодеманттень, кяденттень и ваймонттень лямбоснон инкса. Сюкпря профессияти преданностенкса и верностенкса, пациенттненди цебярь отношениянкса. Кеме шумбраши теентть!»
Мордовия Республикань Оцюнять пресс-службац