14 августста Мордовиянь Оцюнясь Артём Здунов и РФ-са ломанень праватнень коряс Уполномоченнайсь Яна Лантратова васетькшнесть региононь од ломаттнень мархта. Корхтасть Уполномоченнайть институтонц работанц, граждаттнень праваснон араламаснон колга, сянь квалма, кода од ломаттненди ули кода тиендемс правань аралай проектт, ащемс каршек деструктивнай ширети.
Васедемась ётась Мордовскяй республиканскяй од ломанень центраса, эсонза примась участия пцтай 140 ломань: студентт, од учёнайхть, волонтёрхт, студенческяй советонь, поисковай и патриотическяй объединениянь, «Васенцень Движениянь» представительхть.
Мордовиянь Оцюнясь спасибась РФ-са ломанень праватнень коряс Уполномоченнайти республикав саманкса и регионти мялень шарфтоманкса. Пшкядемок од ломаттненди, Мордовиянь руководительсь лятфтазе, што Россиять каршес ушетф тотальнай информационнай война и эряви маштомс ащема каршек деструктивнай идеологияти, кона пачфневи интернетть вельде. «Сембось тя эряви содамс, сяс мес курок тинцьке аратада тядякс и алякс и карматада араламост идентень»,—мярьгсь Артём Здунов.
«Пяк кельгса Мордовиять! Тяса пяк цебярьхть од ломаттне и вии гражданскяй обществась!» - китькстазе Яна Лантратова. Сон азондозе, кода ладяф ломанть праванзон коряс Уполномоченнайть институтонц покодемац. Сонь юрсонза -граждаттнень пшкядемасна и эряфонь башка ситуацияса лезкссь. Васенце направлениятнень эзда фкясь тяни—СВО-нь участникнень и синь мала ломаньцнон праваснон араламасна: пандомань кизефксне, куляфтома юмафнень вешендемасна, пленцта военнослужащайхнень мрдафтомасна, документтнень одукс ладямасна.
РФ-са УПЧ-нь институтсь стане жа заняф законодательствать цебярьгофтоманц, правовой просвещениять, региональнай уполномоченнайхнень мархта марстонь тевонь вятемать, международнай и гуманитарнай работать мархта. Федеральнай Уполномоченнайть видеса вииякшни од ломанень советсь, пуропневи волонтёронь-правозащитниконь добровольческяй корпус. Перспективнай ширетнень ёткса - Правозащитниконь школась.
Од активисттненди ули кода аф аньцек примсемс участия мероприятиятнень эса, но и макссемс эсь инициативаснон, покодемс правань аралай кейснень лангса, получамс общественнай и экспертнай тевонь опыт. Од ломанень советсь пуроптф и Мордовия Республикаса ломанень праватнень коряс Уполномоченнайть видеса.
«Эряви, штоба од ломаттне няелезь эсь инициативаснон результатснон и шарьхкоделезь, кода правань араламань механизматне работайхть практикаса. Тейнек эрявихть ломатть, конат анокт шарьхкодемс прябалатнень и лездомс синь решандамс»,—китькстазе РФ-са ломанень праватнень коряс Уполномоченнайсь Яна Лантратова.
Мордовия Республикань Оцюнять Пресс-службац