Мордовияса 14 августста тиф ушеткс ВМХ-велоспортть коряс Россиянь Чемпионатти и Первенствати. Инь вии ВМХ-трекеронь лемть инкса пялькстома Саранскяи састь спортсметт Россиянь 10 региоттнень эзда: Удмуртияста, Краснодарскяй крайста, Брянскяй, Иркутскяй, Московскяй, Новосибирскяй, Омскяй и Пензенскяй областтнень эзда, Москуста и Санкт-Петербургста. Конешна, всероссийскяй пялькстоматнень медальснон инкса «тюрихть» и Мордовиянь спортсметтне.
Пялькстомань ётафтома вастокс колмоце кизось мельцек арси ВМХ-велоспортть и спортонь техническяй виттнень коряс региональнай центрать суперкроссонцты панжада трексь. Сон панжевсь 2023 кизоня и строяф международнай сембе стандарттнень коряс «Демография» нацпроектть видеса («Спорт России» госпрограммась). Спортивнай сезонть главнай стартсонза сяськомать инкса Россияса тюрихть странань 96 инь вии спортсметтне. Мордовия Республикань сборнай командати сувасть велоспортть коряс СШОР-нь 17 воспитанник.
Россиянь Чемпионатти и Первенствати официальнай ушеткс макссть Мордовиянь Оцюнясь Артём Здунов, Россиянь сборнай командань спортивнай анокламань Центрать директороц Роман Гришин и колмоксть олимпийскяй чемпионць, Россиянь велосипеднай спортонь Федерациять васенце вице-президентоц Вячеслав Екимов.
Шумбракстомок пялькстомань участникнень мархта, Артём Здунов мярьгсь: «Тейнек оцю честь нилецеда примамс ВМХ-велоспортть коряс Россиянь Чемпионатть и Первенствать. Мордовияса кочкавсть инь вии командатне и инь цебярь сядот спортсменць. Серть карматама кирдемонза, вдь аф аньцек анокласаськ спортсметтнень, анокласаськ сай поколениять!»
Республикань руководительсь стане жа поздравляндазень спортсметтнень рьвять и мирдть Наталья Суворовать и Александр Катышефнень–синь шачсь цёрасна Фёдор.
Роман Гришин спасибась Мордовиянь командати инжиень примай Миронь Чемпионатть инкса: «Тейне пяк пара тяса. Тя инь цебярь объектсь спортонь тя видти странасонк, и марнек мирса. Цёраньконди тячи эряви няфтемс цебярь результатт - кота инь цебярь спортсметтне повихть Россиянь сборнайти и кармайхть аноклама Олимпийскяй налхкоматненди».
«Саранскяйса тонадоме ётафнемс пялькстоматнень инь оцю серьса, кеподеськ ётафтомань стандарттнень и старандатама тя планкать кирдемс, - азозе Вячеслав Екимов. - Ломаттне тяса пичедихть спортонь тя видть, эсь спортсметснон инкса, конат достойнайста выступандакшнихть аф аньцек родной республикасост, но и лия площадкатнень эса. Тянди аш кода аф кенярдемс!» Сон стане жа пачфтсь приветствия Россиянь велосипеднай спортонь Федерациять президентонц Олег Сиенконь эзда.
Мордовияса Россиянь велосипеднай спортонь Федерациять, Мордовиянь Минспортть и «АЛЬФА-СПОРТ» АНО-ть ширень кирдемаснон вельде кармай ётафтф эряфс «Велодети» пилотнай проектсь - идень саттнень эса кармайхть работама секцият беговелоспортти занятиянди. Тя лезды иттненди ёмластокиге тонадомс базовай маштомошитнень, конат меле арайхть фундаментокс BMX занятиятненди. Проектть ушедоманцты 60 беговел и араламань шлем максф МР-нь велоспортть коряс СШОР-ти.
Мордовия Республикань Оцюнять Пресс-службац