1 майста, Тундань и Трудонь шиня, Саранскяйса ульсь праздничнай шествия, кона етась «За справедливую экономику в интересах человека труда!» лозунгть ала. Мероприятиять пуроптыец – Мордовия Республикань профсоюзонь Федерациясь. Илань шествияса примасть участия МР-нь Государственнай Собраниять Председателец Владимир Чибиркин, МР-нь Правительствать Председателец Владимир Сушков, МР-ть эзга главнай федеральнай инспекторсь Михаил Сезганов, Саранск ошень округонь администрациянь оцюнясь Петр Тултаев, профсоюзнай лидерхне, «Профессияс коре инь цебярсь» республиканскяй конкурсонь лауреаттне, трудовой коллективонь, организациянь, предприятиянь, политическяй партиянь, од ломанень движениянь и объединениянь представительхне.
Первомайть праздновандамац Мордовияса етась «Тундань и Трудонь праздникти лемтьф республиканскяй мероприятиятнень етафтомаснон колга» МР-нь Оцюнять Указонц эряфс етафнеманц рамкаса. Марнек республикать келес етафтфтольхть аф фкя лацонь акциять, шествият, митинкт, концертт и народнай гуляният. Мордовиять столицаса праздничнай шествияса примась участия 5 тежяньда лама ломань.
Праздничнай колоннась «Электровыпрямитель» ОАО-нь духовой оркестрать мораманц коряс срхкась Святой Праведнай воинть Феодор Ушаковонь Кафедральнай Соборонц маласта, етась Советскяй площадть эзга и валгсь А.С.Пушкинонь лемса культурань и ваймосемань парку, коса кизонь эстрадаса етась илань митингсь-концертсь.
Приветственнай вал мархта мероприятиянь участникнень инголе корхтась Мордовиянь профсоюзонь Федерациять Председателец Сергей Борисов.
«Тундань и Трудонь шить мархта! Тя илась сашенды тейнек тунда, мзярда перьфпяльсь сргозькшни тялонь удомада меле, сембось, мярьгат, эреклакшни. Сяс минь ученттама эздонза цебярь шири полафткст. Тяка пингть минь тинь мархтонт шарьхкотькшнесаськ, што аньцек виень аф ужяльдезь трудендазь ули кода сатомс цебярь эряф эстейнек и иденьконди, - мярьгсь Сергей Борисов. – Сембе планоньконь и арьсеманьконь эшксса ащи трудонь ломаттненди, сятненди, кит тиендьсазь материальнай и духовнай козяшить, кие минь пчкафнесамазь и тонафтсамазь, кие обеспечендакшнесы гражданоньконь мирнайста трудендамаснон, уважандамась. Спасибамань башка валхт тячи минь азонттама производствань передовикнень, трудовой соперничествань сяськихнень, сембонь сятнень лемс, кие эсь прянь аф
ужялезь, эсь асушинц и профессионализманц мархта вярьгак кандсы Мордовиять лемонц».
Сергей Борисов стане жа азозень задачатнень, конат ащихть профсоюзнай движениять инголе, и арьсесь сембонди кеме шумбраши, цебярь настроения, мир и благополучия.
Тяда меле А.С.Пушкинонь лемса культурань и ваймосемань парконь кизонь эстрадаса няфтьфоль оцю концерт.
Фотось Ольга Киреевать («Известия Мордовии»)