25 январьста Республикань Кудть Оцю залсонза казьфтольхть образовательнай организациянь асу од ломаттне, конат сатозь Россиянь Президентть и Мордовиянь Оцюнять премияснон. МР-нь Оцюнять Владимир Волковонь лемста казнетнень максозень МР-нь Правительствать Председателец Владимир Сушков.
«Тя залса пуромсть од талантоньке, сембода машты и отькорь школьникне и студенттне. Тинь идеянте, пользань каннемс мяленте – странать и республикать инь важнай ресурсоц, - азозе В.Ф.Сушков. – Мелянь кизоть итогонзон коряс 63 школьниксь и студентсь сатозь Россиянь Президентть В.В.Путинонь грантонц, нинге 25 ломанць получасазь Мордовия Республикань Оцюнять Премиянц. Тячи минь макссаськ тя казнетнень торжественнай обстановкаса».
Правительствать Председателец отмечазе, што васенцеда премиятнень лувкссна сяда оцю получайхнень лувксснон коряс. Асу шабанди Лицейть выпускникоц Иван Утешев фкя пингста арась Россиянь Президентть колма грантонзон лауреаткс. Тя сатовсь физикать и астрономиять коряс российскяй и международнай олимпиадатнень эса сяськоманц вельде.
Фкя пингста колма премиянь лауреаткс арасть нинге колма ломаттне. Етксост Кемлянскяй аграрнай колледжень выпускниксь Игорь Егоров – республикать историяса рабочай профессиянь «Молодые профессионалы» Национальнай чемпионатонь сяськись. Велень хозяйствань машинатнень тевс нолнемаснон коряс лацонза ашезь мув сембе Россияса.
Специальнай казнеса отмечафтольхть од ломаттне, конат кеподезь республикать лемонц всероссийскяй и международнай творческяй конкурсса. Етксост аф кржа афкуксонь виртуозда, конатненди оцю оценка макссть профессионалхне. Тянь ширде башка отмечафоль пяк цебярь од гармонистсь Владислав Шумкин.
«Тинь сембе проектонте и сатфксонте кемокснесазь республикасонк макссеви образованиять качестванц. Мекольдень пингть Мордовиясь странаса занцесыне васенце васттнень асу шабатнень ширеснон кирнеманц коряс. Омбоце кизось мельцек Асу шабанди республиканскяй Лицейсь занцесы омбоце вастть «50 лучших школ России» рейтингса, сонь воспитаниконза кеняртьфтсть мировой уровеньца од сатфксснон мархта, - азозе Владимир Сушков. – Меля Всероссийскяй олимпиадаса Мордовиянь школьникне занясть 45 призовой васта. Сембе, кит путсть тянди путкс, пуромсть тячи залу».
Отмечафоль, што Мордовияти эрявихть од кадрат наукаса, IT технологияса, промышленностьса, строительстваса, велень хозяйстваса и лия отрасляса, сяс мес республикаса эряфс етафневихть проектт, конатнень лаца аш сембе странаса.
Мекольдень кизотнень Мордовияса цебярь шири полафткст тиендевихть ошнень и велетнень эса, стройсевихть эряма вастт, кит, спортивнай и культурно-развлекательнай центрат, тяниень пингонь предприятият. Тиендеви сембось ломаттнень эряфснон цебярьгофтоманкса.
«Минь сяда товга карматама ширентень кирнема, марса решандакшнемост прябалантень, кизефксонтень, - мярьгсь В.Ф.Сушков. – Благодарностень валхт тячи мялезе азомс сембе тядятненди-алятненди, кие марса шабаснон мархта мольсть оцю сатфксненди. Спасиба теенть тяфтама асу иттнень инкса! И катк синь павазу сай пингсна арай теень казнекс пефтома заботендамантень инкса! Седи ваксста арьсян теенть тиендемс аськолкст инголи, цебярьс надияма и сяда товолдонь творческяй сатфкст великай Россиять, родной Мордовиять панчфокс панжемаснон инкса!»