«Конституцияса путф эряфоньконь юроц, тя цебярьста эряманьконь и виияманьконь гарантоц, сонь лезды сатомс политическяй, экономическяй и военнай безопасностть, - китькстазе Артём Здунов. - Президентоньконь ширень кирдеманц вельде тиенттяма од предприятият, мазопнесаськ ошнень и велетнень. Пяк эряви нолямс ярмакт медицинати, образованияти, культурати и спортти, сяс мес сембось тя обеспечендакшнесы народть ванфтоманц, шачфнемать касфтоманц и эряфть кувалмонц».
Тяфтама питнишитне, кода Родинати вернайкс улемась, межнациональнай ладямась, родной модати пользань кандомати венемомась, эрявихть сембе пинкнень. Самай сяс Президентсь сай кизоть азозе Россиянь Нароттнень единстваснон кизокс.
Мордовиянь Оцюнясь азсь благодарностень валхт боецоньконди, сембода пяк сятненди, кит тяни передовойсот. Государственнай кой-кона оцю казнетне максфтольхть куломда меле. Шавфнень мялямснон лятфтазь кашт аф молезь ащемань минутаса.
Казнеса казьфтольхть Отечествань ламоц аралайхне. Артём Здунов макссь Мужествань ордетт Саранскяйста Андрей Макеевонди и Александр Силантьевонди. Кафцьке геройхне тертьфтольхть церемонияс мала ломаньцнон мархта. Андрей Макеев рьванц Кристинать мархта касфтыхть колма итть: оцю цёраснонды вете кизот, ёмла стиренцты - 9 кофт. И сембода главнайсь, кода корхнихть мирттне-рьвятне, - тя фкя-фкянь колга заботендамась.
Александр и Екатерина Силантьефнень кафта идьсна - школьникт ни. «Марятама гордость аляньконь инкса, сяс мес сон Родинать аралаец», - мярьгсть Оля и Дима Силантьефне.
Торжественнай мероприятияса ульсь нинге фкя важнай церемония - кемнилие кизоса школьникненди паспортонь максомась. Республикань Куду тертьфтольхть шабатне, конат эсь сатфксснон мархта тонафнемаса и спортса сатсть ни уважандама. Республикань Оцюнясь поздравляндазень главнай документть получаманц мархта. «Оцю честь получамс паспортт Великай Победать 80 кизонь топодеманц кизостонза, - мярьгсь сон. - Мялезе, штоба мяляфтолесть тя шить. И штоба Сяськомать 100 кизонь топодеманц отмечалесть идентень мархта. Тя надияма васта сянди, што государстваньке кармай эряма, кармай мяляфтомост геройхнень».
Казнет республикань эряйхненди тяфта жа макссть МР-нь Государственнай Собраниять Председателец Владимир Чибиркин и МР-нь Правительствать Председателец Батыр Эмеев.
Мордовия Республикань Оцюнять Пресс-службац