Мордовияса тёждя атлетикась сувси спортонь базовай виттнень юрс, сон пяк кельгови эряйхненди. «43 тёжянь ломань якайхть тёждя атлетикас, – мярьгсь Артём Здунов. – Тяфта жа минь салатама ломаттнень мяльснон физкультурань занятиятненди ГТО-ть пачк, «Шумбрат-зарядкать» вельде. Сисем тёжятть ломань путыхть вийхть тёждя атлетикати профессиональна, тя оцю сатфкс минь республиканьконди».
Российскяй Федерациянь тёждя атлетикать коряс сборнай командатненди сувайхть Мордовиянь 50 спортсметт, 28 тренерхт и специалистт. Всероссийскяй сяськоматнень эса тядде Мордовиянь сборнаень спортсметтне сяськсть 99 медальхть (40 – зрнянь, 28 – сиянь, 31 – бронзань). Няфтема вастокс ащи, ётай май ковста Якамань коряс Россиянь чемпионатса и первенстваса Мордовиянь спортсметтне арасть сяськикс сембе дистанциятнень эса.
«Сюкпря тердеманкса. Самс тинь республиказонт - тя оцю кенярдема, – мярьгсь Борис Ярышевскяй. – Минь араме содавиксокс тинь спортонь инфраструктурантень мархта, эрявикс объекттнень мархта. Мон няине сянь, што мархтонт лама марстонь тевонь вятемасонк направленияда».
Ульсь азф, што республиканьконь козя спортонь инфраструктурац, сидеста ётафневихть всероссийскяй оцю соревнованият. Тяка пингть, кода мярьгсь Артём Здунов, инфраструктурань пялькссь веши одкстоптома, тя токасы «Мордовия» спорткомплексть и «Старт» стадионть. Васедевомаса корхтасть объекттнень одкстоптомань и синь лезкссна тевс нолдамань коряс арьсемада.
Мордовия Республикань Оцюнять Пресс-службац