10 августста Республикань Кудса ётась Мордовиянь главнай судебнай приставть азомац - тя вастти путф республикаса шачфсь-касфсь Николай Илькин.
Представлениянь церемонияса примасть участия Мордовиянь Оцюнясь Артём Здунов, судебнай приставонь Федеральнай службать директоронц заместителец–Российскяй Федерациянь главнай судебнай приставть заместителец Денис Фирстов, МР-ть коряс главнай федеральнай инспекторсь Михаил Трофимов, Мордовия Республикань Оцюнять и Мордовия Республикань Правительствать Администрацияснон руководителец Булат Хайрутдинов, МР-нь Правительствать Председателец Батыр Эмеев, МР-нь Правительствать Председателенц заместителец Алексей Ежов.
«Судебнай пристафне тиендихть оцю путкс республикань консолидированнай бюджетть пяшкодеманц коряс работати, кона миньцонк социально ориентированнай,–китькстазе Артём Здунов. - Бюджетнай системати вешемань пяльксса пристафнень работаснон виияманц вельде тейнек ули кода прважамс сяда лама ярмак инь эрявикс кизефкснень решандаманкса, населенияти социальнай ширень кирдемань программатненди. Судебнай приставонь службать мархта марстонь тевонь вятемась миньцонк ладяф, но задачатне ламолготкшнихть».
Судебнай приставонь Федеральнай службать директоронц заместителец -Российскяй Федерациянь главнай судебнай приставть заместителец Денис Фирстов мярьгсь: «Судебнай приставонь Федеральнай службать директоронц приказонц коряс Мордовия Республикать эзга Управлениянь руководителькс (мзярс аф лама пингс тевонь тиендикс) тячиень шиста путф Николай Кузьмич Илькин. Вихца кошардомань исполнениянь системаса сон покоди 1998 кизоста сявомок, Мордовия Республикаса ётась ки судебнай приставть-исполнительть эзда сявомок главнай судебнай приставти заместителькс молемс (тя вастть занцезе 2014 кизоста сявомок 2019 кизоти самс), меле арась Пензенскяй областть коряс региональнай управлениянь вятикс. Сембе тя пингть няфтезе прянц аньцек цебярь ширде».
«Спасибан судебнай приставонь Федеральнай службань руководствати шачема-касома регионца покодемать сяда тов мольфтеманкса. Сембе задачатне, конат инголен путфт, улихть пяшкотьфт», - мярьгсь Николай Илькин.
Мордовия Республикань Оцюнять Пресс-службац