«Минь шарфнетяма оцю мяль шумбрашинь ванфтомань кизефкснень лангс – тя инь маряфты сферась, - мярьгсь Артём Здунов. - Демографиянь кизефксне, конатнень тяни минь эрязста кепсесайнек, видеста сотфт минь населениянеконь репродуктивнай шумбрашинц мархта. Сембе установкатне, конатнень путнесыне ингольнек федеральнай центрась и Президентсь сембе вастова сатови медицинань обеспечениять коряс, минь должны тиемс».
Основной докладть мархта выступандась МР-нь здравоохранениянь министрь Олег Маркин. Сон азондсь региональнай здравоохранениянь сферать эса ситуациять колга ётафтф ревизиять результатонзон коряс. Сон няфтьсь, што республикаса шумбрашинь ванфтомань учрежденияса оцю сатомаши, медработникта сатомшкада лама, кда ваномс странань ламоц региоттнень лангс. Тянь видеса медицинскяй сетсь ламода лиседи максф ресурснень эзда регионса эряйхнень числаснонды и кемокстаф норматифненди отношениять коряс. Тя мольфти аф аньцек афобоснованнай ярмаконь ётафтомати, но и макссеви услугань качесть валхноманцты.
Министрсь китькстазе: прявкс задачась – ванфтомс уликс сетть, но тяка пингть содазь тиемс региононь медикнень штатнай расписанияснон эряень лувкссть мархта соответствияс, видеста ладямс маршрутизациять, штоба максомс доступность и цебярь медлездомань максома.
Эрек дискуссиянь форматса коллегиянь участникне ванозь прябалань кизефкснень здравоохранениянь сфераса – медицинскяй организациянь кредиторскяй шумонь касомать туфталонзон, первичнай звенань покодемати подходонь полафтомать, цифровай технологиянь эрязста сувафтомать.
Корхтамась мольсь республикаса обязательнай медицинскяй страхованиянь системать финансовай обеспеченностенц эффективностенц касфтоманц и финансовай дисциплинать виияфтоманц, хирургическяй службань касомань-вииямань перспективатнень, специализированнай медицинскяй лезксонь цебярь максомать и лиятнень колга.
Мордовия Республикань Оцюнять пресс-службац